“Luh, dibi ya maan nelpun tiang biyin. Ya ngorahang dot pesan katemu ngajak tiang”. Kénten Tu Éka nyaritayang parindikan sané dibi sanja majeng ring Luh Tini.
“Héhéhé…, men kénkén jani Ka? Ngidang lakar ketemu ngajak Mang Dani di mingguné ené? Apa Éka kondén siap ketemu ngajak iya jani? Kénten Luh Tini nyawis bawosnyané Tu Éka.
Tu Éka, Luh Tini sareng Mang Dani tuah pasawitran sané rumaket pisan. Ipun sareng-sareng ngeranjing ring siki sekolah taler dados siki kelas. Punika taler ipun sering pisan mabligbagang indik peplajahan sané kapolihang ring sakolah, taler ipun sering nyaritayang parindikan ipun soang-soang. Minakadin ipun indik pikobet-pikobet sané kapanggihin ring ragané soang-soang. Ipun sareng tiga sampun dados semeton sané sida kaajak saling curhat.
“Ais,,, jeg nyantep sajan ngorta ajak dadua né oé. Ada apa ené ajak dadua dogén. Sing dadi milu besik? héhéhé…”. Nadak sara duk punika Mang Dani rauh ka kantin tur nyelag pabligbagang Tu Éka sareng Luh Tini.
“Yeh…, Mang Dani. Mai dini bareng negak”. Kénten cawisan saking Tu Éka sambil ngejer santukan ipun makesiab nyingakin Mang Dani sané dados piranti pablibagannyané sareng Luh Tini, nadak sara wenten ring arepnyané.
“Nah-nah… éh, ngomong-ngomong apa sih kaortayang ajak dadua ené. Jeg ngaé penasaran dogén”. Raos Mang Dani niki medal tatkala ipun nuju malinggih ring samping Tu Éka. Ring kursi lantang ipun sareng kalih malinggih tur ring belat meja ngajeng tuah Luh Tini manten sané malinggih padidian. Tu Éka rumasa ngarudug bayun ipun santukan ipun jejeh pisan yening Man Dani uning tekening indik bebawosannyane sareng Luh Tini sané wantah mawosan ragan Mang Dani.
“Ah, sing ada apa Mang. Sing ada sané serius sajan. Busan tuah ngortang, nyén ja kira-kira makatang juara 1 umumé ané jani? héhéhé….”. Luh Tini ngutsahayang ngipekang unteng bebawosané sané wawu.
“Béh, yén ento sih suba kena ban nebag. Ané makatang juara 1 jani, pasti ja bli Tu Éka. Yen tiang jeg sing mungkin suba asané. Apa malih tiang sainang melajah uling sik bli Tu Éka-ne. Sing beneh keto Luh?”. Kenten Mang Dani nyawis pitakené Luh Tu sambilanga nyingakin Tu Éka.
Tu Éka tuah makenyem elek manten. Ipun tan sida medalang suara napi-napi santukan kimud ipun majeng ring Mang Dani. Antuk sebeng elek, ipun maling-maling nyingakin paras Mang dani ritatkala mabligbagang sareng Luh Tu. Sayan nyingakin parasnyané, ipun rumasa sayan tan sida naenang utawi ngenkebang malih indik napi sujatiné sané wenten ring hatinyané.
“Tét,,, tét,,, tét,,,”. Suaran bél sekolah sané nyihnayang ngeranjing kerja bhakti sané mangkin jagi kapuputang sampun masuara. Para sisyane sami pada magrudugang mapunduh ring lapangan ngemargiang penyacakan utawi absen hadir siswa. Punika teler ipun sareng tiga muputang pablibagannyané taler nawur sekancan beblanjannyané ring kantin, laut sareng macacak. Ri uwusan para Gurunyané nyacakin para sisyané, sami lantas sisyané kadadosang budal ka jero soang-soang.
Sapangarauh Tu Éka ring jeronnyané, ipun nénten ja sekadi biasané sané lantas ngentosin penganggé sekolah ipun. Punika taler ipun tan madué manah ngajeng. Sané mangkin ipun langsung malinggih ring kursi sané wénten ring kamarnyané. Tv-nyané taler kaidupang, nanging ipun nénten ja sumeken nonton acara sané wénten ring Tv. Ipun wantah bengong. Nerawang paliatnyané ngayalang Mang Dani, taler a sliabang hatinyané mabawos; “Mang, pelih kéh beli yening beli demen tur tresna ngajak Mang? Bli nawang I raga suba matimpal uling pidan pisan, nanging ené suba sané ngaenang tumbuh tresnané di hatin beli. Ulian mekelo matimpal, beli dadiné seken nawang dewek Mang sané masolah tur maparas ayu ento. Pelih kéh yén tiang tresna sareng Mang?!!!”. Laut lantas ipun glibag-glibeg ring pesareannyané antuk manah inguh ngenehang indik rasa sané kadruénang majeng ring Mang Dani.
“Tu,,, Tu,,,”. Tatkala sawatara kalih jam sampun langkung sasukat Tu Éka ngeranjing ring kamarnyané, meme ipun ngelunin ipun.
“Tiang mé,,,. Wénten napi?”. Kénten ipun nyawis suaran méményané sané kapireng samar-samar ring pintu kamarnyané.
“Ené ada Luh Tini timpal Putu-é ngalihin Putu mai. Ento iya ngantiang di balé bengongé. Énggalin bedik kema jagjagin iya, apang tusing makelo ngantosang ditu!”
“Ouw, inggih mé,,,. Mangkin tiang jagi merika.” Tu Éka nyawis suaran méményané.
“Yéh, dadi enu ngangga baju masuk Ka? Sing maan meganti endén?”. Kénten pitakéné Luh Tini majeng ring Tu Éka sané sampun Rauh ring balé bengongnyané.
“Aa puk, kondén maan meganti baju ené. Ulian busan kadung inguh kenehé bakat ngenehang Mang Dani, héhéhé,,,”. Kénten Tu Éka nyaritayang déwéknyané sané kari nganggé penganggé sekolah. Punika taler ipun laut metakén, “ Ada apa ené Luh Tini, adi tumbén ajin tusing ada PR Luh mai melali ka umah tiang?”
“Ené Luh, kanggoang ané kené dogén ada dini. Sambilang minum téhnyané nah”. Méményané Tu Éka nyelag ngunggahang teh taler sanganan majeng ring Luh Tini.
“Béh ibuk jeg repot misi ngaryanin tiang téh, nanging jeg suksma ajan niki buk mumpung tiang bedak masi, héhéhé…”.
“Nah-nah, eda misi kimud-kimud biyin. Minum sampun sambilang ngorta ajak Tu Éka. Ené ibuk lakar nutugang matanding malu. Luh sareng Tu Éka, dini suba malu nah”. Kénten méményané Tu Éka negesin ipun sareng kalih sambilang memargi nuju balé daja, santukan jagi matanding banten drika.
Ri uwusan punika, Tu Éka sareng Luh Tini ngalanturang pablibagannyané sareng kalih sambil ipun miletin téh taler sanganan sané kaicén olih méményané Tu Éka.
“Béh bli Tu, ené tusing ja ulian PR tiang mai. Kan mara suud ulangan umum, pasti kan sing ada PR biyin. Mani-mani yén suba masuk melajah biyin, mara ja mungkin ada PR, héhéhé,,,”. Kenten Luh Tu nyambungin pitaken Tu Éka sané wawu.
“Men ada apa men Luh mai jani ené?”
“Kéné Éka, tiang kal ada orahang bedik ngajak Éka ngenénin indik Mang Dani”
“Hah,,, Mang Dani? Ada éngkén ajak iya?”. Kénten Tu Éka nyawis pawacanan Luh Tini antuk makesiab santukan Luh Tini nyambatang Mang Dani sané dados idaman atiné Tu Éka taler pinaka sawitranyané.
“Sing ja ada kénkén Ka. Cuma dugas puan ya maan ngorang ajak tiang, ada anak nyambatang tresna ajak iya dugasé telun. Anak sané nyambatang tresna tekén iya ené madan ngurah sané kelas 3B ento. Kéwala Mang Dani kondén ngemaang jawaban ngajak Ngurah kanti jani”. Kenten Luh Tini nyambatan parindikan Mang Dani sané dugasé telun majeng ring Tu Éka.
“Mimih,,, éngkén bedik carané jani ené Luh !!!? Tiang nawang I Ngurah ento anak bagus pisan kéto masi sugihan tekén tiang,,,. Béh, ené suba ngancan ngedén-ngedénang halangan tiang yén kal ngorahang isin keneh tiangé ngajak Mang Dani”. Kénten Tu Éka nyawisin Luh Tini antuk semu kaciwa tekéning deweknyané padidi.
“Adah, Éka eda naké nyerah kéto. Jani kené carané; suwudang monto ngomong aji hp nganggo adan Iwan. Jeg orahang gén ento ragan Tu Éka. Eda misi mengkeb-mengkeb kéto biyin, nyanan énggalang salipa teken Ngurah. Apa jani Mang Dani ngorang edot katemu ngajak Iwan, berarti ento kan pang maan kepastian iya malu. Jani ené suba, mumpung Mang Dani enu ngantiang Iwan, makané orang nyen sujatiné é Iwan sané sai nelpun Mang Dani Uling pitung bulan sané suba liwat ené”. Kénten Luh Tini ngutsahayang ngicénin pamargi majeng ring Tu Éka.
Iwan sané kabawosan olih Luh Tini punika sujatiné tuah Tu Éka pedidi. Ipun nganggé aran Iwan ring telpun tatkala nelpun Mang Dani. Antuk magentos aran ring telpun, Tu Éka rumasa danganan mawicara ngenénin indik kasujatian manahnyané majeng ring Mang Dani. Punika taler Mang dani sané nyantos mangkin nénten uning indik Iwan sané sering nelpun ipun punika sujatinyané wantah Tu Éka sané dados sawitranyané padidi. Indiké puniki karahasiang olih Tu Éka sareng Luh Tini majeng ring Mang Dani, ento sané ngawinang Mang Dani nénten uning sira sujatiné Iwan puniki.
“Bih,,,,. Bani ja tiang muka rahasia tiang nah Luh Tu. Takutin tiang nyanan disubané Mang Dani nawang yén Iwan ento tuah dewék tiang padidi, sing ja kal gedeg ngajak tiang nah?”. Kénten malih Tu Éka nyawisin pabawosnyané Luh Tini.
“Yén unduké ento, sing suba tiang nawang endén Ka. Man yen sing cobak malu, kan sing tawang penadiné kal kénkén. Kené naké Ka! Biyin mani kan pembagian rapot, disuwud ento maniné kan libur duang minggu. Nah mani suba galahé luwung ngorahang makejang unduké ené tekéning Mang Dani. Eda bas makelo mengkebang rahasiaé ené, anak tiang masi sing luwung keneh tiang makebang-kebangan ngajak Mang Dani sané suba dadi timpal luwung uling makelo”.
“Sajan Luh, tiang anak tusing dadi ati masi bas makelo ngantung Mang Dani nganggo adan Iwan di telpuné. Keto masi tiang suba ngancan tusing ngidang ngengkebang makejang biyin. Sebilang matemu ngajak Mang Dani, jeg ngeruntag bayuné kadi rasa sing ngelah bayu anggo ngenkebang keneh tiang ané sujatiné ngajak Mang Dani”. Sekadi kénten Tu Éka nyawisin raos Luh Tini sambil nyumekenang ngeresepang napi sané sujatiné sampun kalaksanyang olih ipun.
“Aha,,,. Keto suba naké dadi anak muani, eda jeg jejeh malu. Men kénkén kal rencanané mani ené?”. Kenten Luh Tini nyumekenang Tu Éka indik napi sané jagi karencanayang benjangnyané tatkala jagi nyambatang tresna majeng ring Mang Dani.
“Mmm,,,. Ené enu ngirimin Mang Dani sms kal ajak katemu biyin mani. Nah antiang dogén satua selanturnyané mani, héhéhé,,,”.
“Béh, seken naé nah. Mani ortin tiang”.
“Santaé dogén, mani Luh Tini pasti orin tiang kok. Antiang dogén dikantin disubané suwud maan rapoté nah”. Kénten Tu Éka nyambatang rencanan ipun majeng ring Luh Tini.
Ri uwusan punika, Luh Tu mapamit taler budal ka jeronnyané malih santukan galahé sampun sandé. Punika taler Tu Éka mangkinkinan jagi masiram. Tatkala punika, galahé ngancan peteng tur Tu Éka raris mesaré ring kamarnyané nyantos semeng. Tatkala semengé sampun rawuh, ipun mangkin matangi lebih dumunan tekénin sekadi biasanyané. Ipun rumasa paling santukan rasa liang, inguh, ngarudug, jejeh, garcita tur takut mamesik ring hatinyané tatkala minehin jagi nyambatang tresna majeng ring Mang Dani sané dados sawitranyané padidi. Gelis-gelis ipun martaki-taki taler raris memargi ka sekolah.
Sesampuné ipun rawuh ring sekolahnyané, nénten ja sekadi biasané ipun sareng sawitrane sané tiosan. Ipun tuah mendep kémanten santukan ipun minehin Mang Dani. Ngantos puput pembagian rapotnyané, ipun taler tan sanget ngarawos. Tu Éka terus minehin Mang Dani, nyantos ipun eling tekéning janji sané pacang matemu ring kantin sareng Mang Dani sané kasambatang liwat sms ring rahinané dibi. Antuk punika ipun memargi nuju kantin sekolahnyané. Sapengerawuh ipun ring kantin, ipun sampun nyingakin Mang dani sareng Luh Tini malinggih padaduanan sambilanga minum téh.
Ring tengahin raményané para sisya sané wénten ring kantin punika, Tu Éka rumasa makebieng nyingakin Mang Dani. Ring hatinyane matakén-takén; “Aduh, apa bedik orahang jani ené? Yén jujur ngajak Mang Dani, sing ja iya kal gedeg tur ngambulin tiang nah? Apa ulian ené tiang ngajak iya lakar suwud matimpal nah?”. Punika rasa was-was sané wénten ring hatinyané Tu Éka.
“Bli Tu…, énggalin bedik mai!”.
“Yeh, nah-nah…, adéngin malu. Ené enu mesen nasi”. Punika Tu Éka nyawis rawosnyane Mang Dani sané ngelunin ipun, taler sambil nyaruang manahnyané sané inguh nyingakin Mang Dani.
“Ka…, apa kal edotang jani, jeg jemak dogen suba. Lagu ené ada Mang Dani lakar mayahin jani ulian iya maan juara II. Keto masi iya ngorahang mula lakar nraktir Éka ulian suba sesai ngajahin Mang Dani. Sing beneh keto Mang?”. SÉkadi kenten Luh Tini mabawos majeng ring Tu Éka sané nuju malinggih sareng-sareng taler Mang Dani sané wenten ring sampinyané.
“Béh sajan ento Luh. Ené suba jani lakar ngorang suksma ngajak bli Tu Éka….,”. Kénten Mang Dani nyawis bawosnyané Luh Tini.
“Éh…, Mang. Éngkén kasus Mang ajak Ngurah ento?”. Nadak sara Luh Tini ngentosin indik pablibagan antuk parindikan I Ngurah sané polih nyambatang tresna majeng ring Mang Dani.
“Ah, kondén ada apa Luh. Tiang anak enu gabeng keneh tiangé, sawiréh tiang enu ngantosang lakar katemu ngajak Iwan sané sesai nelpun tiang ento”. Tu Éka sané nyamar dados Iwan rumasa tangkejut tur simpatan, tatkala ipun mirengin bawosnyané Mang Dani sané nyawis pitakene Luh Tini.
“Héhéhé…, éngkén ento Éka? Adi jeg sambrag nasiné?”. Kenten Luh Tini nakenin Tu Éka sané sedeng kabilbil simpatan.
“Ah, sing éngkén. Bakat pelih ban magelekan dogén bedik”. Tu Éka nyawisin Luh Tini sambil ngengkebang manahnyané.
“Ouw…, kadén anak kénkén. Eh man éngkén jani ené Ka? Eda bas makelo nyan pang sing kasep, apang tusing ulian elek ajak takuté ento dadiné buwung magelekan nyan, héhéhé…,”. Kénten Luh Tini nyawis taler ngélingang majeng ring Tu Éka mangdé gelis nyatuayang manahnyané majeng ring Mang Dani. Tatkala punika taler Luh Tu magingsirang dewék.
“Adéh…, lakar kija ené Luh? Adi jeg énggal-énggal sajan?”. Kénten Mang Dani mapitakén sareng Luh Tini sané matangi saking kursi.
“Sing kija Mang…, ené kal ada alih malu bedik di kantor”. Luh Tini nyawis pitakén Mang Dani tatkala ipun sambil magedi ninggalin sawitranyané sané sareng kalih punika. Sujatinyané tan ja wénten sané dahat penting sajan sané jagi karuruh olih Luh Tini. Nanging Luh Tini jati tuah nyelapang magedi mangdé Tu Éka sareng Mang Dani polih Padaduan kémanten, sumangdéné ipun Tu Éka danganang nyatuayang isin hatinyané.
“Mang…, komang ada janji jani ae?”. Kenten Tu Éka sagét nadak sara nakénin Mang Dani.
“Janji,,,?. Ah sing ada Bli Tu”. Kenten Mang Dani nyawis. Sakéwanten ring hatinyané Mang Dani, ipun makesiab santukan sujatiné ipun madué janji pacang katemu sareng Iwan ring dinané sané mangkin. Punika taler ring hatinyané Mang Dani, ipun matakén-takén; “Ngudiang bli Tu Éka nakonang janji nah? Iya nawang ja unduk tiang majanji sareng Iwan sané jagi matemu ring diwang sekolahé bénjepan?”. Kénten pitakén sané wénten ring hatinyané Mang Dani.
“Mmm…, seken ento nyan Mang?. Bénjep disubané mulih uling sekolah, tiang anak ngelah janji lakar katemu di arep sekolahe ngajak anak istri”. Kénten Tu Éka ngicenin tampak-tampak utawi tanda-tanda sareng Mang Dani.
“Yah, adi patuh ajak janjiné tiang nah?”. Kénten pitakén sané wénten ring hatinyané Mang Dani tatkala mirengin bawosnyané Tu Éka. Sakéwala Mang Dani nénten ja curiga sareng Tu Éka. Laut lantas Mang Dani matakén; “ Beh, céwék ajak bli ketemuan benjep toh…, héhéhé…,?”.
“Aa Mang, ento céwék ané suba makelo sajan bakat kenehang. Kéwala kéweh ban nyambatang isin keneh tiang. Yan sing pelih suba ada uling pitung bulan ban nelpun-nelpun iya, kéwala sing juari katemu endén. Nah ané benjep ené suba rencanan tiang lakar katemu sareng céwéké ento”. Kénten Tu Éka nyawis pitakéné Mang Dani.
“Ah.., ngudiang patuh sajan ajak janji lan paundukang tiang ngajak Iwan nah? Ada apa ja ene?”. Kenten Mang Dani ring hatinyane. Santukan tan sida makebang malih, Mang Dani laut macerita sareng Tu Éka indik janjinyane sareng Iwan; “Bli Tu, sujatine tiang anak madue janji masi benjep. Keto masi jeg patuh sajan unduke ngajak parindikan bli Tu Éka sané dot katemu sareng sang sané edotang utawi tresnanin. Benjep disubane bel mulih, tiang kal ngantosang ditu di mukak sekolahe”. Kenten teges Mang Dani nyaritayang deweknyane majeng ring Tu Éka.
Tu Éka tuah makenyem elek tur jejeh-jejeh bani tatkala mirengin bawosnyane Mang Dani. Punika taler Tu Éka laut nyambatang majeng Mang Dani; “Mang, eda suba komang ketemu ditu benjep apang tusing makele komang ngantosang ditu. Ene sang sané lakar ajak komang matemu suba ada dini”. Kenten Tu Éka mawicara.
Mang Dani makesiab mirengin sané kabawosan olih Tu Éka. “ Apa si magsudné ené?. Ngudiang bli Tu Éka ngorang keto?”. Kénten pitakén sané wénten ring hatinyané Mang Dani, nanging ipun tuah mendep kémanten, nénten mesuang suara aneng a kidik santukan bingung sareng kawéntenan ipuné.
Mang Dani nénten ja polih nyawisin raos Tu Éka, sagét lantas Tu Éka ngaraos malih; “ Mang, apang tusing komang bingung tekén munyin tiang, ané jani tiang lakar nyaritayang makejang-kejangné. Kené Mang, sujatiné ané madan Iwan sané sesai nelpun Komang ento tuah ja wantah dewék tiang Mang”.
“Berarti ané ajak tiang mejanji pacang katemu jani ento, tuah ragan bli sané sujatiné?”. Kenten Mang Dani nyawisin sada makesiab tur nenten percaya.
“Beneh Mang, ento tuah bli sujatiné”.
“Men bli ngudiang misi mengkeb-mengkeb kakéto ngajak tiang?”. Pitakén Mang Dani malih.
“Sujatiné tusing ja ada keneh jelé ngajak komang, kéwala beli jejeh ngorahang yening sujatiné bli tresna ngajak Komang. Sané jejehin bli ento; takutnyané komang ngambul uling bli yening kanti komang nawang keneh bli ené. Keto masi bli takut yening ulian ené I raga dadi pegat matimpal”.
“Béh, man jani ngudiang bli enyak ngaku tur ngorahang makejang tekén tiang?. Apa jani bli tusing jejeh yening tiang lakar ngambul tur ngelidin bli, keto masi apa bli tusing jejeh yening tiang lakar megatin matimpal?”. Kénten Mang Dani malih nakénin Tu Éka.
“Rasa jejeh ento stata ada Mang, kéwala beli suba tusing sajan ngidang ngengkebang keneh bli. Keto masi Bli rumasa pelihan yéning ngengkebang rasa ané ada di keneh bli ené yén katimbang tekén bli ngorahang. Ento sané ngawinang bli jani jeg ngelagasang dewék nyambatang unduké ené ngajak Komang”.
“Béh.., bli jelé sajan ngajak tiang. Ngudiang man bli makelo kéto nguluk-ngulukin tiang. Monto pidan-pidanan tiang nyaritayang indik Iwan nika, ngudiang jeg bli ngidang mendep dogén. Tusing ladné pedalem ningalin tiang ané penasaran keto aa bli?. Nah, lamun kéto jani I raga suwud suba matimpal bli!!!”. Kénten Mang Dani ngerawos nyarocos taler masemu ngambul.
“Béh, yén dadi idih; eda naé kanti suwud matimpal yen mula saja Mang tusing nerima tresnan tiang”. Kénten Tu Éka ngalemekin Mang dani. Tu Éka taler masemu sedih santukan ipun sampun ruamasayang yéning déwék lan laksanan ipun iwang tatkala nyingakin semunyané Mang Dani.
“Ah…, sing dadi kéto! Pokokné harus pegat matimpal jani. Kanggoang suba I raga neked dini dogén matimpal!”. Kénten Mang Dani malih negesin Tu Éka.
Tu Éka wantah mendep kémaon. Ipun tan sida ngaraos napi-napi. Ipun masuserah sampun majeng ring Mang Dani. Ring hatinyané ipun ngamikmik; “Béh, kudiang man jani? Ené nasiné suba dadi bubuh, sing ngidang ngomong apa suba biyin jani”. Kénten ring hatinyané Tu Éka sambilanga ipun bengong.
“Bli Tu…, Bli Tu…, Bli Tu…,”. Kenten Mang Dani ngelun-ngelunin Tu Éka sané makelo mapangsegang sangkaning mirengin rawosnyané Mang Dani sané nyambatang pacang megatin masawitra.
Tu Éka nénten ja manyawisin Mang Dani. Ipun kari bengong tan sida minehin napi-napi. Tatkala punika, Mang Dani sané I wawu malinggih belat méja ngajeng sareng Tu Éka, laut matangi nampekin Tu Éka. Ipun malinggih nampek pisan sareng Tu Éka taler ipun nyujuh tangannyané Tu Éka sané kari maplengek bengong mapangenan. Laut lantas Mang Dani ngaraos; “ Bli Tu, ampurayang ja munyin tiangé sané wawu punika”.
Tu Éka wantah mendep kémanten, santukan ragané kari nyeselin laksananyané padidi.
Nyingakin Tu Éka sané wantah mendep tur bengong punika, Mang Dani rumasa nénten sida malih lakar nyailin utawi micandin Tu Éka.
“Bli Tu…, sujatiné tiang anak demen masi ngajak Bli Tu. Patuh ngajak bli Tu, tiang masi ngelah rasa jejeh yening lakar ngorang tresna”. Kénten mang dani nyaritayang dewéknyané sané sujati.
“Ah…, Mang nguluk-ngluk ené. Yén tusing keto, ngudiang Mang ngorang suwud matimpal ngajak tiang busan”. Kénten Tu Éka nyawisin sada masebeng enduk.
“Yéh…, ento anak munyin tiang ané beneh bli. Kéwala caran tiang ngorang mula sengaja agak rengasan bin bedik. Nah apang maan dogén nyandén Bli Tu, héhéhé…”. Kénten mang Dani nyawisin sambil kedek.
Miragi bawosnyané Mang Dani, Tu Éka rumasa senengan malih kidik. Kéwala ipun kari ragu antuk rawosnyané Mang dani. Laut lantas ipun malih nyumekenang; “ Man apa maksud mang ngorang suwud matimpal busan ento?”. Kénten Tu Éka nyekenang.
“Yéh…, masak monto tusing ngerti?! Artiné jani suwud matimpal biasa, lan jani matunangan ngajak tiang. Ngudiang masi jani I raga suba pada nanwang isin keneh I raga tur suba pada-pada demen, kan luwungan matunangan jani….,héhéhé”. Kénten Mang Dani nyawisin Tu Éka.
“Man I Ngurah sané oranhanga maan ngorang demen ngajak Komang ento, lakar kénkénang komang?”. Kénten Tu Éka malih nakénin indik caritanyané Luh Tini sané nyatuayang Mang Dani kocap katresnanin olih Ngurah sané bagus di kelas III.B ento.
“Ouw…, Ngurah?. Ah, depang gén suba bli. Nyanan tiang lakar ngorahang padidi yéning tiang suba matunagan ngajak bli. Apa buin rasa tiangé enu gedénang tekén bli yen bandingan tekén keneh tiang ngajak Ngurah. Napi malih tiang ajak bli suba pada nawang jelék luwung i raga soang-soang. Pokoné, jeg tenang gén indik masalahé punika”. Kénten Mang Dani nyawisin pitakényané Tu Éka.
Tu Éka makenyem girang miragi bawosnyané Mang Dani, taler ipun ngedetin tangan Mang Dani laut memargi nuju lapangan sekolah, santukan bel sekolah sané nyihnayang wénten paarah-arah saking Guru sadurung sisyané budal sampun mamunyi. Ipun sareng kalih memargi girang, taler ngarencana lakar macerita sareng Luh Tini sané sampun rumaket masawitra sareng ipun sareng kalih.
Puput.
Olih; I Wayan Kertayasa - https://babakanpole.blogspot.com/
0 comments:
Post a Comment