Dugasé cenik makébék nagih apang énggal kelih. Jani disubané kelih, sangkal buka anak mekamen di sunduk. Jelek baan ngorahang unduké jani, jeg makejang kéweh. Ngancan menék tua ngancan ngéwehang. Pejalané buka anak ngalih balang ngaba alutan. Kénkénang men jani baan makiba! Apa jatiné ané arepang? Yening lakar nguberin ngisinin keneh, anak tusing ja lakar telah. Buka anak nguberin kesugihan sané lakar kuangan lonto. Tusing lakar apa taen lakar rumasa jangkep. Jeg kuangan lonto.
Minehin dewéké, tepukin gobané di mekané, buka anak memusuh asané ngajak dewéké ané jani. Yéning dijané kaden pelih? Apa ulian tusing taén mebakti? Yén orahang kéto, ento anaké ané nyemak gegaén jelék buin nyakitin anak, sangkal ngidang ipun kedék? Aruh jeg piteh-pitek atiné baana! Keneh lakar mambanang pejalané nuju ipiané, kéwala jeg katos sajan asané. Ada dogén sané kuangan. Bin kuang kéné, buin kuang kéto lan liu sajan piambeng sané rasayang.
Buin suluhin deweké, nyén sujatiné cai? Apa lakar alih cai kanti matiglig melihang déwék! Yéning ngidang lawaté melahang mekané, asané jeg belahina suba ento mekané. Buka anak nengkik lan misi meleng asané digantiné masuluh. Digantiné keto anak rumasa tusing maji asané pejalané sané suba liwat. Yéning selehin anak tusing ada asané sané tusing ulian utsaha sané seken. Diapain suba seken mautsaha, liu masih ané konden manutin kitané. Tusing ja liu! Miribang ratan suba tusing ngidang nekang asil ané arepang. Rumasa dewék kéné pelih kéto boyo. Likad asané baan majalan, kéweh asané lakar baan ngenehang unduké ané lakar teka.
Ngangsel asané angkihané naenang sekelé. Nyelempang di pesaréan buka anak puyung papinehé, kadi anak ngemasin buduh. Baat baan makeneh ngantos rumasa kambang déweké. Ané jani tusing ada buin lakar ngidang baan ngulehang. Yening lakar ngisinin kitané, anak suba rumasa tusing sajan ada selah. Tuah ngidang ngaksamayang dogén suba jani. Jeg serahang suba tekén embangé.
Baat sajan baat baan, mula saja kondén nhidang nerima makejang-kejangné. Mula sajan buka pituduhé dadi jatma sané makejang kuang, tusing ngidang suba melihang unduk buin. Jani tuah ngidang nyalanin apa sané ada di aepé dogén. Tusing suba buin lakar makeneh gedé apang tusing buin gedé kaengané yening tusing ngidang nambakin digantiné pocol.
Seka bedik ngleming asané sundihé di ulun atiné. Nyumunin buin makinkinang ngulehang dewék. Suba ada uling makudang-kudang lemeng baan buka anak tusing ngelah papinéh. Jani nénénang benehin malu adéng-adéngin. Paling tusing apang ngidang malu ngedengang bibihé apang dadi kenyem. Apang misian bayu buin bedik. Kanggoang suba jani matimpal ngajak angin, matimpal ngajak pasih, matimpal ngajak buron.
Ngancan mai ngancan ngidang makeneh. Yening telehin dewéké saejoh nénénang anak tusing ja kuangan ajengan. Mongken ja nistané, anak tusing taén apa nganti makenta ragané. Kéto masih yening tingalin uling deweké anak tusing ada apa kuangan. Uling muncuk ebok nganti muncuk kukun batis anak suba jangkep. Minab ulian keneh bas loba, gedé lan kangkang. makejang bakat arepang. Digantiné tusing ngidang makatang, sinah ento dadi sesel. Pelih-pelih tusing bisa baan lakar ngajiang idupé.
Mangkin kinkining jumunin menehin dewek. Jumunin uling papineh lan tatujon. Apang ngidang maguna di pauripan. Yéning tusing ngidang enden maguna buatang anak liu utawi ngajak palemahan, paling tusing apang ngidang raga ngajiang swecan kauripan sané kapicang. Adéng-adéng majalan, sekenang pejalané apang tusing singsal. Buka pupuhé "Bawang, tiuk puntul anggon pasikepan" .
Puput.
Olih; I Wayan Kertayasa - https://babakanpole.blogspot.com/
0 comments:
Post a Comment