Ngetohin Déwék | Cerpen bahasa Bali

 

“Yan nang élingan ragané jani suba tamat SMA, kari wayan ngelah galah lantang kal nguberin ipian wayané. Melahang jani mapineh tur milihin napi sané sepatutné dados totujun utawi angen-angen wayané. Diastu uwa tusing ja bapan wayané sané seken, kéwala uwa nak kal sadia ngetohin Wayan. Nanging kanggoang malu pang kuala ngidang mejalan dogén.”

Asapunika raos uwané I Wayan Bulug mapiteked tekéning ragan Wayané. Mangkin I Wayan Bulug saja wawu muputang sekolah SMA-nyané. Ipun rumasayang inguh ring hatinyané ritatkala nentuang totujon pamargi ragané sané jagi kaambil. Menawi Wayan sané dados pianak ubuh olih uwanyané rumasa elek yéning jagi nunas ngelanturang pasekolahané.

“Yan,,, Wayan Bulug, ngudiang melengok bengong keto. Uling busan suba kauk-kauikin, sing masi mesaut. Sing pireng munyin tiang Yan? Ada apa sih sujatiné ené, tegarang sambatang Yan. Masi I raga suba bareng-bareng uling cenik, diapin tusing menyama kéwala I raga suba makilit adané matimpal. Yan,,,.!”. Kenten Nyoman Budi ngelunin I Wayan Bulug kasarenging antuk neplakin tangannyané.

Ngatéplak I Wayan Bulug tatkala Nyoman Budhi ngeplakang tangannyané di arep Wayan Bulugé. Nyoman Budi saja tuah sawitrané I Wayan Bulug sané saking alit sampun sareng-sareng tur rumaket masawitra nyantos mangkin. Kawéntenang Nyoman Budi doh pisan matiosang sareng I Wayan Bulug. Kaluarganyané Nyoman Budi saja danganang kawentenannyané yening katimbang sareng Wayan Bulug. Diastu sekadi kénten, nanging Nyoman Budi tan ja minayang sawitra antuk kawéntenan sawitranyané. Ipun jakti polos tur malih mabudhi luhur.

“Aish,,,, tenang gén man, sing ada apa-apa né kok. Busan tiang kat kadung bengong ngenehang bapan tiang ento. Mangkin kari napi tan éling mapianak sareng tiang.” Kénten Wayan Bulug nyawis pitakéné Nyoman Budi.

“Béh jeg eda ento buin kenehangga Yan. Ané penting jani kan suba ada uwan Wayané ané pinaka bapa. Apa buin ragané tusing masomahang. Jeg sulengang kenehé nganggep uwan Wayané ento pinaka Bapan Wayan. Eda bas ngarepang bapa kandung Wayané sané suba masomahang malih tur ngutang ragan Wayané ngajak uwan wayané ento. Kéwala eda masih wayan bas engsap tekén bapan Wayané ento, anak jelek melahné Wayan masi ngelahang reramané. Nah kéwala inget dogén bedik,héhéhéhéhéhé…..”

Wusan mirengang raosnyané Nyoman Budi, I Wayan Bulug rumasa inangan manahnyané. Nanging nika wantah kesep pisan. I wayan Bulug malih inguh ring manahnyané ritatkala ipun rumasayang kawéntennyané sané dados pianak ubuh. Diastu uwanyané sampun maparilaksana sekadi ngajak pianaknyané pedidi, nanging I Wayan kari rumasa méweh ngeraosang utawi nekedang manahnyané sané meled jagi ngelaturang sekolahnyané mangdé sida molihin ipiannyané dados Guru. Santukan punika, ngaliwat dimanahnyané jagi pacang pegat masekolah.

Duang wuku sampun lintang I Wayan ngambil ijazah ring sekolah SMA-nyané. Kauningin olih I Wayan indik penyanggra mahasisya ring universitas sané kaarepang wantah kari telung dina manten. Saking inguhnyané manah I Wayan taler ipun rumasa takut utawi elek yening bas sanget mapaidih-idih tekén uwanyané, lantas sungsut taler ngembeng toyan panyingakané. A sliabang nerawang ring manahnyané I Wayan jagi ngengsapang ipiané sané dados Guru punika. Sadurungnyané, Nyoman Budi sampun uning cita-citané I Wayan sané meled lakar dados Guru punika, santukan I wayan sampun polih nuturang sareng Nyoman Budi.

“Yan, ngudiang Wayan jeg sebet sajan asanang tiang. Ada apa sujatiné ené? Keto masih dibi sms tiang adi sing wales wayan, padahal tiang makeneh ngajakin Wayan mendaftar di universitas keguruan. Engkén ené, payu lakar nutugang masuk ditu apa Wayan kondén maan nyatua ngajak uwan wayané ené. Yéning Wayan kondén maan nyatuang keneh wayané ajak uwan Wayané, nah mai tiang ja nulungin ngorang yéning Wayan edot nutugang masuk di keguruan ngajak tiang. Apa buin uwan wayané taén nyatuang ngajak tiang; yéning Wayan nyak kal nutugang masuk, uwan wayané anak misadia lakar mabiayain taler nukung Wayan mangda sida molihin ipian Wayané. Eda bas sanget makeneh, Wayan ngajak uwan wayané anak suba ngelah keneh sané patuh sujatiné.” Kénten raosnyané Nyoman Budi tekéning I Wayan Bulug.

Yakti janten uwané I Wayan Bulug misadia lakar nanggung sekancaning prabya masekolahnyané I Wayan yéning I Wayan madué papineh jagi ngelanturang masekolah. Ring dija ja kayuné I Wayan jagi ngelaturang masekolah, uwan I Wayané misadia lakar nyakolahang.

Sangkaning dahat méweh karasayang olih I Wayan jagi nyatuang papinehnyané majeng ring uwannyané, nika sané ngawinang medal manahnyané jagi muputang pasekolahannyané tuah rauh nyantos SMA manten. Nanging pakenohnyané I wayan jagi puput masekolah puniki, sanget ketambakin olih Madé Karsa sané sareng dados kantin ipun.

“Yan,,, nag ja keneh-kenehang malu papineh wayané ento. Buka pamunyin Nyoman Budi busan; uwan Wayané anak suba nyadia lakar nukung Wayan kanti makatang ipian wayané. Eda rasa eleké ento anggona panganbeng tindakan Wayané. Kéto masi uwan wayané sané nénten masomahang taler tan madué pianak. Jani wayan ané etohina apang mani puané wayan ngidang ngayahin uwan wayané pinaka bapan wayané. Eda bes sanget takut-takut keto ngorang, apa buin anak wayan dogen ané cageranga besik. Jeg tutugang sekolahé saenuné uwan wayané ngidang tur nyadia nanggung sekolah wayané. Kewala keto masi, di mani puané wayan arus misadia ngayanin uwan wayané buka uwan wayané ngayahin wayan jani”. Kénten pabaosnyané Madé Karsa tatkala sareng mapupul ring kamarnyané Wayan Bulug.

Mula saja uwané wayan lakar nyadia nanggung tur natadin I wayan mangdé sida molihang masa depan sané becikang antuk masekolah.

Ring manahnyané wayan kari wénten rasa bas lobha yéning ipun nunas pacang ngelaturang masekolah tekéning uwannyané. Ipun rumasa tan pantes mapaidih-idih bas akéh tekéning uwanyané, santukan Wayan ngerasayang ragan ipuné tuah anak ubuh. Pinika sané ngawinang manahnyané wayan jagi ngelanturang masekolah ring kaguruan sayan ical tur wayan mapineh lakar makuli manten.

“Duh wayan,,, eda bawak kéto ngaba papineh. Ilanggang keneh wayané ané kal buung masekolah ento. Ené adané wayan enu ngelah galah lantang tur enu ngelah kasempatang nutugang pasekolahané. Nang je pineh-pinehang biyin, apang tusing nyesel ulian buung masekolah. Apa buin wayan nawang yéning uwan wayané suba nyadia lakar maprabiyain sekolah wayané. Eda ulian rasa eleké ené dadi buung magelekang. Suudang monto makeneh ané tidong-tidong. Mai ajak lanturang masekolah apang misi masi keneh uwan wayané sané ngarepang wayan apang dadi anak maguna di kawekasan”. Asapunika raosnyané Nyoman Budi nyekenang I Wayan Bulug mangda ipun madué papineh adung sareng uwan ipun.

Parindikan I Wayan Bulug mapikayunang dados Guru puniki, deréng kauningin olih uwannyané. Sané jakti uning wantah kantinyané Nyoman Budi sareng Made Karsa kemaon.

Uwusang nyatua rikala sanja punika, Nyoman budi sareng Madé Karsa laut ngalin I wayan Bulung ring kamarnyané padidian, santukan galahé sampun sayan peteng. Risampuné sawitrané punika budal ka jeroannyané soang-soang, I Wayan Bulug ngamik-mik padidian. Doh manahnyané nerawang-nerawang nanging kari tan sida ngicalang manah takut taler eleknyané mejeng ring uwannyané yening jagi nyambatang manahnyané pacang ngelanturang masekolah ring sekolah kaguruan.

Sayan peteng, anginé sayan ninginang. Punika taler I wayan bulug sayan rumasa kiap. Kasuén-suén I Wayan lantas tan éling tekén raga santukan ipun mesaré lelep pisan. Tatkala ngedas lemahang, ngedéplak I Wayan metangi santukan ipun ngipi sané nénten becik. Tangkejut taler bengong, mewali ipun malinggih ring pesaréan tur natakin jagutnyané.

Malih ipun ngéling-élingang raga, nadak sara ipun éling tekening raos sawitrané sané dibi sanja sané nyambatang; “yéning kari wénten kasempatang, jeg jemak énggalin apang tusing nyesel. Eda rasa eleké ento ngaénang buung magelekang”. Sapunika raos sawitrané sané sida kaélingin olih I wayan Bulug. Punika taler ipun éling tekening pabesen uwanyané sané nekedin ipun mangdé mineh-minehang antuk sumeken indik pemargi sané jagi kaambil riuwusan tamat ring SMA .

Sué Wayan bengong kasambilin mireng pakruyuk siapa sané nyanggra semeng. Sayan semeng, siapé sayan ramé kruyukannyané. Punika taler pacruét suaran kedisé tatkala semengé ento. Wayan uning punika nyihnayang suryané sampun endag ring sisi kangin, nanging I Wayan déréng medal saking kamarnyané. Ipun kari inguh padidi, minehang pamargi jagi nyambatang pikenehnyané majeng ring uwannyané. Napi malih benjangnyané wantah galah sané paling ungkur antuk pendaftaran ring universitas sané kaarepang olih I Wayan Bulug. Sayan mapineh sayan ngarudug teler bayuné I Wayan.

Tatkala punika, nadak sara jelanang kamar I Wayané kadodog olih Nyoman Budi.

“Yan neng enggalin bangun! siapé suba ngékéh di natahé ené, héhéhéhéh”. Kénten Nyoman Budi ngelunin I Wayan Bulug sambil makedékang.

“Nah-nah Man, antosang malu kejep. Jani suba kal bangun.” Kénten I Wayan Bulug nyautin sambilanga magegésoan ngampakin jelanané.

“Béh, enu mapecéh Wayan oé. Kema manjus malu laut maeséh naé nah. Enggalin dik, ené kal ada satuang dik, héhéhéhéhé”. Kénten Nyoman Budi nekedin I Wayan tatkala matemu di jelanané.

Magegésoan I Wayan Bulug masiram taler magentos panganggé. Ngerudug bayunyané ngenehang indik  wénten napi sujatiné niki. ”Ngudiang Nyoman jeg semeng sajan mai ya nah. Mebaju rapi taler nganggé sepatu aken”. Kénten I Wayan ngamig-mig tatkala mengelisang nganggé penganggé.

“Man mai naé, tiang suba suud maeséh ené. Kal ajak kija ené, adi tumbén semeng létég kéné ngalih tiang?”. Kénten I Wayan Bulug metakén tekén Nyoman Budi.

“Nah, jeg tutug gén. Bénjep gén Wayan nawang kok kal kija I raga bénjep. Jani mai malu ka jinengé”. Kénten Nyoman Budi nyawis pitakéné I Wayan Bulug sambilanga memargi nuju jineng sané bedauh balené Wayan Bulug.

Tatkala pemarginé sareng kalih sampun nampek ring jineng, kacingak olih I Wayan Bulug sampun wénten Madé Karsa sareng uwanyané makakedékang. Laut raris sayan ngarudug bayuné I Wayan Bulug, kénten taler ring manahnyané minehang unduké puniki. “Wénten napi ja sujatiné niki?”. Kénten pitakén sané wénten ring hatiné I Wayan Bulug.

Nadak sara Madé Karsa nyapatin ipun. “Énggal téh bedik yan mai malu. Engkén né keneh wayané, seken bayuné lakar nutugang masekeolah di universitas keguruan?. Yening seken, mai lan ajak mendaftar jani. Pang sing kadung kasép nyan, takutné mani sing ngidang mendaftar biyin”. Kenten Madé Karsa nyapatin I Wayan sabilanga kenyem-kenyem.

“Yan, dibi sanja tiang ngajak Madé Karsa maan nyatua bedik ajak uwan Wayané, setodéné tiang ngajak Madé Karsa mulih uling dini. Jeg orang tiang ja buka ané kenehang Wayan sané makeneh lakar nutugang masekolah bareng-bareng ngajak tiang lan Madé Karsa. Ané jani uwan wayané suba uning makejang tur sitinut ngajak pakeneh Wayané. Disubané kéto, ené tiang ngalih wayan mai tuah lakar ngajakin Wayan naftarang déwék di universitasé ento”. Kénten Nyoman Budi malih nyumekenang tetujoné rauh  ngarereh I Wayan Bulug tatkala semeng punika.

Makesiab taler mecampuh bayu ngetor tur liang kasanin olih I Wayan Bulug ritatkala uwusang miragi pabaos Nyoman Budi. Buka mapacek baan paku cangkemnyané I Wayan, enggep tan nyidayang mabaosang napi-napi.

“Yan, seken buka ané orahanga tekén timpal wayané ené. Sujatiné uwa anak edot masi Wayan apang nutugang masekolah. Eda pesan buin wayan ragu lakar mendaftar jani. Uwa kal misadia ngurusang Wayan apang kanti seken-seken bakat Wayan Ipian wayané sané edot dadi Guru ento. Kéwala kanggoang apang pada ngidang majalan dogén malu. Eda bas sanget gedé ngabé papineh. Ané penting, sekenang masuk dogén. Eda misi ngitungang kené-keto buin. Uwa jeg pastika lakar nukung yéning Wayan suba enyak seleg masekolah”. Kénten raos uwané I Wayan Bulug sané buka ngetisin manahnyané I Wayan Bulug.

“Inggih uwa, yéning sampun sekadi pabaos uwa sané wawu, mangkin suleng sampun manah tiang jagi ngelaturang pasekolahan tiangé. Menawi wénten singsal pelaksanan tiangé sané elek-elekang puniki, tiang nunas ampura sareng uwa. Tiang mejanji sampun yening benjangan tiang lakar tusing malih madué manah elek-elekan sekadi puniki”. Kénten pabaosnyané I Wayan Bulug tatkala ngunggahang seneng ring hati taler ngaturang suksmaning manah antuk kasidan uwan ipun nukung pemarginé sané jagi ngelanturang pasekolahannyané.

Uwusan punika, I Wayan Bulug sareng sawitrané mamitang dewek majeng ring uwané, santukan jagi memargi naftarang dewék ring universitas sané katuju.

(Puput..)

Olih; I Wayan Kertayasa - https://babakanpole.blogspot.com/

Read More

Matemu Wirasa | Cerpen bahasa Bali - Cerita bahasa Bali

-Matemu Wirasa-

Tatkala sebeté tan sida katambedang. Kadiang nebekin ulun hati. sayan makelo sayan dalem krasayang. Kidemang utawi kedatang, tuah yéh panyingakan di pipiné ngancan nyumekenang. Nyricik kadi toyan ujan. Sayan makelo sayan sambrag liaté. Laut nyilem dalem doh ring dasarin ulun hati lan papineh.

Kidem kedatang tuah sepi. Peteng ngieng kadi tan wénten sané nguni. Kitak-kituk tusing nawang unduk. Kija lakuna tindakan batisé buka tusing matotujon. Diastu lemah petengé terus mesalin rahina kanti nyabran sasih, enu masih dini di tengahin dedet ané tusing masundih.

“Heh…., ngudiang dini majadeng? Bengong buka barongé mejanjangan”. Nadak sara anak mebaju sutra putih madeg di arepe. Pilih-pilih maselanan paningalan tiang ningalin, yéh adi buka mangkuné masarana putih.

Liaté enu paling, edot metakon nanging kasusu. Kaselek tusing ngidang mamunyi. Pineh-pinehin, nyén ja ento ané tepukin. Kadiang ngisikin ulun hati. Aji ningalin dogén, tiang ngasananin yéning ragané madué kleteg sané dalem pisan. Masrieng bulun kalongé buka kaupinin angin sané dahat alus pisan.

“Niki kéh tiyang?”. Sagét makeplés pitakené ané buka kené ring bwana papinehé. Kadiang nusukin, rasa tusing percaya. Kadi buka ngipi ningalin jeg patuh ngajak tiang masarana putih. Sekancan deweknyané kakaput ban sunaran putih kedas sané tamis-tamis padem ring tengahin dedet.

Meselanan tiang maekin, lan ngusahayang nyujuh tur macapatan. Dot pisan tiang metakén. Kewala ipun kadi anak melaibin tiang. Ngancan alih, ngancan ngejohang. Grapa-grépé matindak di tengahin peteng samar-samar tanpa tatak, ngancan makeleo ngancan emed suba. Kéwala ipun sané putih tan makipekan anang abedik. Kanti rumasa kenyel awak tiang, ipun enu ngarep tundun dogén.

Telah daya telah bayu suba. “ngudiang ragané melaibin tiang?”. Pitakéné ené pesu uling bibih tiang sané sampun rumasa sengal-sengal meangkihan. Lemet suba asané déwéké, nganti limané matunjangan di entud mesada nguntuk naenang kenyel.

“Tetegang ja ragané. Selanang bangun tur cingakin ring kacané ento!”. Makesiab tiyang ningehin pasawuté ento. Suarané niki kadi………….., kadi…….., suaran tiang. Nyén ja sujatine ené?

Dini di pesaréan buka anak ibuk, uling dini lan uling ditu rumasa teka petakon tekén déwéké. Sané jani mglibegang rumasa tusing ngidang. Seke besik ingetang, apa minab sane kirang lan napi minab sane iwang sangkal bisa pitek kéné. Mangkin maselanan seka besik nyiksikin bulu. Solahé sané suba liwat anggon sasuluh. Sayan rumasa baat lan kéweh, mangkin pejalané sané paling melah wantah ngaksamayang kawéntenén deweké. Nguduhang sami pinaka paica. Jelék melahé sané tepuk di galahé sané suba liwat aksamayang dados pemargi nuju melah riwekasan.

Seke bedik, adéng-adéngin diastu sesek rumasa tangkahé, nanging tuah niki marginé abesik sané kabaos matemu wirasa majeng kawéntenan déwéké tur ngaksamayang sami sané sampun kapaica. Jumunin malih uling panyumu, netegang déwék majalan buka anak mara lekad sané matangkih puyung lan maadonan ngajak sasuluh solahé sané suba liwat. Bekel déwék baan selegang mlajah buka pengambek "Pupuh Pucung - Tiyuk puntul, Bawang anggén pasikepan".
 

(Puput ...)

Olih; I Wayan Kertayasa - https://babakanpole.blogspot.com/

Read More

Percakapan bahasa Bali "Dokter"

Pabligbagan Basa Bali "Dokter"

Latra	M	Méméné, yéning buin mani mabuka ja prakték dokteré nah?
Nyoman	F	Anak ngudiang ladné bapané nakonang dokter abuka tekén tusing?
Latra	M	Ento dibi Kadék ulung disekolahané koné dugesé macanda ngajak timpalné. Tatu lantas batisné Kadék, ané jani dadi ménanah tatuné. Baag goba tatuné, mirib sakitanga gati ento kanti ipun aduh-aduh busan.
Nyoman	F	Adah ngudiang ngantosang buin mani, jani ja ajakka puskésmas. Jani puskésmas anak suba a waian mabuka utawi petang likur jam. Kemu ajak malu apang maan ubad.
Latra	M	Oh saja, kanggoang dokter ané lénan ae méméné.
Nyoman	F	Ae bli, ngudiang masi sanget anak tatu kéto. Tusing ja werlu ka dokter spésialish. Yéning tatu kéto carah tiyangé malunan anak pasti wersihina, ané kapertama nganggo alkohol. Disubané ento mara ja balina, pantes jait utawi tusing. Nah disubané kéto baanga suba antibiotik.
Latra	M	Lakar méméné pedas nawang?
Nyoman	F	Pidan anak maan tatu kéto ladné bapané, tuah monto suba carané dokteré ngubadin tatu-tatu ané carah kéto. Buka kesot, babak, lan tatu tatu cénik. Cutetné eda kanti inféksi, pasti monto dogén orahina ajak dokteré.
Latra	M	Oh nah, lamun kéto kaukin jep Kadék apang dadi ajak ka puskésmas apang maan ubad uling dokteré ditu malu. Apang idongang gis sakit tatuné. Paling sing apang ilang malu besehné.
Nyoman	F	Nah-nah bli jani tyang ngaukin Kadék malu. Bli kemu naé makikén malu, apang tusig énggalang sanja.
Latra	M	Om Swastyastu Pak dokter...
Dokter	M	Nggih, Om swastyantu pak. Punapi niki oka pak?
Latra	M	Kéntén Dok, dinané dibi ipun labuh laut matatu sotsot entudné. Dibi ipun anak néntén napi-napi asané, kari prasida ban majalan sékadi biasané. Sakéwala tuni seméng duk jagi makikén ka sékolahan, ipun nyambatang sakit tatuné ipun. Mara cingakin tiyang, jég bantéh sampun tatuné sekadi mangkin.
Dokter	M	Oh..., Anak alit jakti anak sampun biasa labuh yéning maplalian. Napi malih Alit-alit sané mayusa iaban okan bapak puniki. Pasti sampun sai maplalian lain-laiban, tusing benéh kéto gus?
Kadék	M	Inggih pak dokter...,
Dokter	M	Nggih, tan kenapi. Mangkin ngiring tabain tatuné mangda gelis segér. Mangda nyidang masuk masekolah malih.
Latra	M	Pak dokter ampura, niki tyang matakén kidik.
Dokter	M	Nggih, punapi pak? Kangngéang niki tiyang nyawis nyambi tiang nambain Kadék okané bapak.
Latra	M	Inggih pak dokter, tan kenapi. Sapunki pak, yéning dokter spésialish ngajak bapak sané dados dokter ring puskésmas puniki sujatiné jati matiosan pak?
Dokter	M	Oh indik punika tios punika pak. Sané ngawinan matiosan ento wantah swadarmané sané kaambil. Yéning sékadi tiyang niki katah kasambatang dokter umum. Genah tiyang ring gagawéan punika ring poliklinik. Sekadi mangkin niki tiyang nambain okané bapak. Nah swadarmaning dokter umum punika dadosné nuréksanin sané paling utama ring sang sané sungkan. Tiyang turéksanin dumun, sungkan ipun dahat kéras utawi néntén. Risampuné tiyang polih cawisan saking teliksik sané kalaksanayang titiyang punika, wawu titiyang ngambil tindakan wastané. Drika yéning sungkan sané loktah utawi umum, dadosnyané durusang tiyang sané nambanin. Sakémanten yéning wénten sungkan sané dahat keras utawi sérius, nika tiyang karyanin rujukan wastané sumangdané sang sungkan katambanin olih dokter spésialis sané manutin sungkan sané sang sungkan.
Latra	M	Oh kénten nggih pak dokter. Nggih yéning niki pasiené sampun segér mawali risampuné katamban olih pak dokter, tén jég kidik dokter spésialis polih pasién dok?
Dokter	M	Yéning unduké nika tan nyidang baosang kénten, santukan mangkin anak akéh sané madué sungkan keras-keras. Napi malih mangkin ajéng-ajéngan sané sampun akéhan nénten ja séhat sékadi ajéng-ajéngan anak dumun. Conto ipun soda, mié instan, lan sané tiosan. Nika sané ngawinan anak mangkin akéh madué sungkan jangtung, vértigo, kanker, gagal ginjal tur sané tiosan. Nah nika dadosné dokter spésialish sané nambanin.
Latra	M	Mih jakti kénten nggih, pantesan yéning ring puskésmas punika néntén wéntén anak nureksang sungkan sékadi jantung, kangker lan sané tiosan ento.
Dokter	M	Inggih, punika sampun. Santukan yéning ring puskésmas sekadi driki anak wantah sekadi perbantuan sané katujuang majéng ring parikrama sané madué sungkan-sungkan ingan mangdéné polih tamba gelis tur mangdé néntén sayan dados keras sungkannyané. Sangkaning punika makasami sané wénten ring puskésmas anak sarana lan prasarana sané loktak-loktah manten.
Latra	M	Ampura dok, yéning biasané ento anak serangan jantung ento kan biasané nadak nika nggih dok?
Dokter	M	Nénten ja sekadi kénten cutetné pak. Yéning serangan jantung punika sujatina sampun nyidayang kauningin ritatkala wénten sungkan-sungkan ingan. Nah yéning kari nyidayang nambanin di puskésmas, patutné driki tambanain. Sakéwala yéning sampun dahat keras, nika nénten nyidayang nambanin ring puskésmas.
Latra	M	Oh kénten nggih pak!
Dokter	M	Inggih pak. Pak niki sampun wus katambanin tatuné Kadék.
Latra	M	Inggih pak, niki napi manten niki ubadné pak?
Dokter	M	Niki wénten salep anggé ngolésin sabilang sanja. Taler wénten pil, nika minum pang telu sabilang dina.
Kadék	M	Mémé, ené tiyang suba teka uling puskésmas. Mara enyak luwungan asané mara maan ubad tatuné.
Nyoman	F	Men apa isina tatuné busan ngajak dokteré?
Latra	M	Kedasina busan, buka ané orahang méméné tuni.
Nyoman	F	Néh sing saja, anak ené tusing ja tatu kéras. Sakéwala yén tusing ubadin sinah bisa dadi kéras.
Latra	M	Sajan méméné. Éh busan dugesé ngubadin Kadék, iseng ngorto ngajak dokteré. Koné yéning dokter spésialis ento tuah ngubadin sakit ané keras-keras dogén méméné!
Nyoman	F	Beneh ento bli, buina anak yéning dokter spésialish ento anak liu sorohné utawi kepahné. Conto ipun ada dokter jantung, ada dokter saraf, ada dokter tulang, ada dokter kandungan, ada dokter anak lan sané tiosan. Nah mangkin sané madué sungkan puniki katambanin sampun manutin soroh sungkan ipun Yéning Sakit jantung, kemu ka dotér jantung kéto masi yén mréksang bélingan kemu ka dokter kandungan lan kéto masi ané lénan.
Latra	M	Bih liu kéto ada dokter spésialis méméné!
Nyoman	F	Liu bli, apa buin carah jani anak ngéndah sakit anaké ulian tusing nuratiang ajengan sané kaajéng. Jég ngarapu anaké ngajéng carah jani. Ento carah alit-alité sagét suba meli soda, di kénkénné saget suba meli ayam tepung, bisa misi maimbuh mi instan. Ento suba ajengan ané kabaos cépat saji ento anak liu misi ubad-ubadan sané ngidang ngaénang sakit carah janiné.
Latra	M	Méh ajan anak méméné maan masekolah di perawat, asin suba nawang.
Nyoman	F	Yéh campah adané bli to, diastun dadi dagang bunga jani. Anak ento werlu masi apang tusing iraga ngawag maajengan.
Ayu	F	Pih jeg luwung asané yén dadi dokter spésialis nah!
Nyoman	F	Yéh saja anak mula luwung Yu, apa buin ngidang magaé sambil matetulung ngajak anak. Ento suba sané utama yéning iraga dadi jatma diguminé ené.
Latra	M	Néh sing suba ngwayahan satuané méméné éné, ha.., ha...,
Ayu	F	Béh bapa nénénan demén dogén nyandén mémé, ha..., ha...,
Latra	M	Nah apang ada kedékin, sing kéto Mén Sari?
Mén Sari	F	Sajan, apang tusing jeg bonjos dogén magaé. Ejin masi makédékan bédik apang tusing wadih iraga magaé, hi..., hi...
Latra	M	Éh Kadék tusing ja nyak utawi ngélah pikenoh utawi cita-cita dadi dokter disubané kelih buin pidan! Éngkén Dék, nyak dadi dokter? Ento emboké suba dadi sarjana ékonomi lakaran, cocok suba nglanturang utsaha mémé ngajak bapa. Jani céning apang ada bésik ané ngidang ngalimbakang apang dadi dokter.
Kadék	M	Siap pa..., apa sih ané tusing yén suba bapa ngajak mémé ané ngorahin. Jeg gas, apa buin yéning dadi dokter spésialis, pasti sampun luwung asané.
Ayu	F	Énah, lamun kéto sélégang anaké mlajah jani cening apang tusing jeg maan palungguh dogén mémé ngajak bapa ulian bengkung ceningé di sekolahan. Yén suba cening dueg masekolah, mani puanan aluhan buin bédik lakar ngalih sekolahan, diapin ja bapa ngajak mémé lakar buin ngietang mautsaha, sakéwala apang ada masi lebihné cening. Anak cening ané lakar nyalanin lan ngaba masi mani puan. Duga yéning cening ané dueg, mémé ané maan juara. Kan tusing Dék!
Kadék	M	Siap mémé jegég, cenik gaé ento! ha..., ha...,

Puput.

Olih; I Wayan Kertayasa - https://babakanpole.blogspot.com/

Read More