Balinese short story "cleaning the house", Cerpen bahasa Bali, Cerita bahasa Bali, Satua Bali

"Mareresik"

Luh Gedé anak mula tuah mémé ané jemet sajan lan seleg sajan makedas-kedas di jumahné. Biasané sebilang semengan yén suba suud nyakan, ipun ngénggalang nyemak sampat lakar nyampatang natahné. Lénan tekén nyampat dinatahné, ipun tusing ja engsap makedas-kedas di tengah umahné sekadi togos pesaréan, WC, pagenahan tamiu, paon lan sané tiosan. Ipun bisané makedas-kedas sadurung ipun majalan magaé, sasubané suud ngaénang kurenan lan pianakné dedaarang angona semengan. Ané siduri kedasina biasané WC ipun, santukan ipun suba suud ngedasin ané liénan laut ipun sambilange kayeh sambilanga ngedasin WC. Nyanan suwud ipun ngedasin WC lan kayeh, majalan sampun ipun megarapan ka kantor koprasi ané mabuka uling galah sia semeng ngantos galah telu sanja.

Luh Dé	Kayehin suba malu Wayan nah bapané, né tyang lakar nyampatang natah malu apang tusing énggalang tangai.
Gedé	Nah méméné, men né paone nyén ngedasang?
Luh Dé	Benjep dogén cepokan yén suba Bli ngajak Wayan suud madaar semengan. Yén jani kedasin, benjepan won atiné buin ngumbahin piring dogén.
Gedé	Lamun kéto kemu naé méméné nyampat, Bli lakar ngajak Wayan madaar malu lan suud ento ngingkinin Wayan ka sekolah.
Luh Dé	Enah, ené suba lakar nyampat. Bénjep sambilang ngayehin Wayan, tulung wadahin krésék sambilang leluwuné ané ada di WC nah bli. Apang dadi ejang di wadah leluwuné di aep, bénjepan apang jemaka ngajak pegawé kabersihané.
Gedé	Luwun apa to méméné?
Luh Dé	Ento kulit sampo, kulit sabun lan apa buin ento ané suba tusing meanggo. Nyanan yén suba kalin bapané ajak Wayan apang dadi kedasin WC-né.
Gedé	Nah ento dogén natahé malu sampatang apang tusing bes kenyel semengan. Ngedasin WC dadi benjepan sambilang méméné manjus.
Luh Dé	Ento suba keneh tyang bapané. Benjep yén suba suud ngedasin di natah ngajak di paon, apang dadi tiyang kayeh sambil ngedasin WC-né apang tusing belig batarané lan bakné apang esehin tiyang yehné apang tusing dadi umah legu.
Gedé	Benjep lamun suba lakar ngedasin WC, inget ditu jemak ubad leguné di motor méméné nah. Tuni engsap ngaba ka WC, keneh lakar anggo ngejin yéh di WC apang tusing misi panak legu. Ditu di montor ada masi sabun kramik anggo ngedasin bataran WC-né. Ditu ja di gantungan motor megantung aji krésék barak. Anak mapunduh ditu prabot lakar anggo di WC.

Ulian Gedé demen sajan nepukin kurenanné seleg makedas-kedas jumahné, iseng ipun mliang sabun WC apang ada angona ngedasin WC-né tekén méméné Wayan di jumahné. Sabun ento luwung pisan yén anggo ngedasin kramik buiné aluh nganggoné tusing werlu buin misi sanget ngebegin. Ulian ento bapané Wayan mliang Luh Gedé sabuné ento apang tusing bas kenyel nyanan kurenanné makedas-kedas. Apang ngidang masi Luh Gedé mapayas, yén suba énggal suud makedas-kedas. santukan anak sebilang wai geginané Luh Gedé masi maburuh ka koprasi sabilang galah sia semeng. Nah apang jegégan masi kurenané tepukina tekén bapané Wayan. I Gedé uatawi bapané Wayan ené anak mula sayang sajan ngajak kurenan lan ngajak panak, ipun demen nepukin yén makejang seleg lan asah-asih asuh.

Luh Dé	Sangkal liu mablanja bapané? anak anggo ngudiang dogén sabun téhel ento?
Gedé	Tusing liu ento méméné. Ento sabun téhel ento liu gunané.
Luh Dé	Men sing mael sik sabuné ento? Ané keto-keto anak mael biasané ajiné.
Gedé	Nah maelang buin bedik tusing kénkén, apang aluhang ngedasin Wc-né nyan.
Luh Dé	Men apa gén gunané? misi ngosot buin yén suba ngango sabuné ento?
Gedé	Kéné méméné, ento sabuné ento alus sajan lan miyik boné. Nyanan méméné campuhin aji yéh a cédok. Isinin sabuné ento duang tekep dogén. Nah disubané kéto polésang ka bataran lan dinding WC-né utawi kramikné. Disubané keto antosang limang angsel utawi menit, lalang lantas sambil usap aji lap. Jeg nyalang buina miik suba WC-né. Tusing werlu kanti mapeluh méméné ngedasin WC.
Luh Dé	Men aji kuda bli meli sabuné ento bli? Tusing kuangan pipisé tuni anggon mablanja? Asané nak genep sajan bli ngaba pipis yén ka peken, tusing taén ngaba pipis lebihan. Apa buin yén ka peken ngajak tiyang.
Gedé	Tusing méméné, ento sabuné tuah aji molas tali rupiah. Tuni enu ada susuk, ané keto kal bliang apang aluhang méméné ngedasin WC-né.
Luh Dé	Beh nah, lakar tegarang anggon buin kejep, nyak ja carah pamunyin Bli.
Gedé	Nah tuwutang dogén carané nganggo ané carah orin bli ento. Pasti jeg demen atin Iluh ngedasin WC. Bisa ngidang sambil magending-gending ngedasin WC. Apa buin anak jaen sajan boné, ngidang suba Iluh sambil malulurang di WC sambil ngedasin WC, sambilang manjus. Lénan tekén ento maan ba méméné galah mapayas satondén majalan makuli.

Sabun sané kabliang tekén Bli Gedé ento anak sajan luwung pisan. Lénan tekén ento aluh masi ngalih di dagang dagangé buina tusing baya yén kaanggo di jero soang-soang santukan suba katuréksanin olih MENKES tur misi Beacukai. Nika ciri yening barag nika sampun dados kaadep ring sejeronin krama. Mula saja maelang buin abedik sakéwala luwung pisan santukan sabun ené misi antiseptik apang ngidang bebas bakteri. lianan tekén luung angon apang WC-né sehat, sabuné ento masi misi pamiyik sané miyik nyangluh sajan. Yén suba ngango sabuné ngedasin WC-né, jeg carah toko lengis miik bon WC-né. lianan tekén ento, né sabuné masi suba mabukti angona tekén madé wira, sangkaning ento tiyang jeg makita nyobak orin kurené ngango di jumah.

Luh Dé	Béh seken naké bapané! Né jeg guyu dogén ajak bapané. Kénkén men ngebeg nyusut WC misi sambil ngebegin dewek. Jeg ngéndah dogén ajak.
Gedé	Yéh nak saja ento, ento buktiné Madé Wira kedas sajan WC-né. Dibi maan melali ka umahné dugas nelokin bapané ané gelem. Kebenengan ditu nagih ngenceh lantas nyilih WC. Paih jeg kedas sajan WC-né. Ulian ento sampun takonin bli apa anggona ngedasin WC sangkal bisa kedas kéto?
Luh Dé	Beh suba ada ané muktiang sabuné ené?
Gedé	Sube jelas memene, yen tusing keto ngudiang men bli mliang sabun kéto buin misi maelang.
Luh Dé	Nang tegarang aba mai sabune bli? jeg dot nawang. Asané sih luwung sabuné ento ulian ajiné mael. Biasané anak kéto lamun ada aji pasti ada luwungné barangé ento.
Gedé	Ené méméné, ené misi bebacan sané anggona ngaé sabuné ené tur misi gunané.
Luh Dé	Men apa ngunané bli? tegarang baca apang tiyang nawang. Tyang won atiné maca enu semengan kené, Bli dogén ané macayang.
Gedé	Sané simalu ené maguna anggon ngedasang lumut lan wongan di krami, ané palet dua meguna anggon apang miyik, ané palet telu misi ubad anggo abang bebas bakteri téhelné.
Luh Dé	Megenep masi gunané ae bapané.
Gedé	Megenep Luh, né tegarang adekin boné! Miyik sajan lan carah anak misi anti septik. Pasti ento ané anggona apang bebas bakteri.

Sakukat covid ring panguntat warsa 2019 ento saja liu ada aob ring sekancan parilaksana kramané nglaksanayang geginan sewai-wai. Akéh parilaksan sané kagentosin, minakadi stata ngango camuk ring sejronin ramé-ramé uatwi paguyuban. Kéto masih ring sekancan krama ngancan ulet nglaksanayang lan nyaga wewidangan apang stata kedas tur higenis. Yéning dugesé covid punika ramé, liu anaké nyemprotang disinfektan ring soang-soang jeroné nuwutin patuwah uling pamerintahé. Sakewala ring pengrauh ngantos jani, liu sampun maelénan. Anak tusing ja enu nyemprotan disinfektan, santukan jani suba liu carané anaké ngedasin wewidangannyané. Silih siki contoné ento nganggo sabun sané suba misi campuhan antiseptik ané ngidang dadi disinfekatan. Conto; sabun sané anggona ngepél utawi sabun lantai. Jani suba mekejang misi antiseptik, dadiné yéning sampun ngepél dados sampun medisinfektan. Ulian ento tusing werlu buin repot nyemprotang disinfektan sasubané suud ngepél.

Luh Dé	Misi antisepktik kéto orang bli busan? Tusing ja ento sané angona ngaé disinfektan duges covid ramé ento bli?
Gedé	Ento suba silih sinunggil lakar disinfektan ento Luh. Ené miribang sabuné ené gaéna dugesé ento masi, mirib ngancan canggih apang tusing misi disifektan sané liénan, jani dadianga besik ngajak sabuné. Dadiné yén makedas-kedas ngango sabuné, cepokan suba langsung ngidang steril WC-né utawi bataran sané kakedasin aji sabuné ené.
Luh Dé	Nyak asané ento Bli, jani suba tusing taén buin anak ngango utawi nyemprotang disifektan buin.
Gedé	Ento suba anak apa ja sekancan sarana ané anggo mabersih, minakadi sabun manjus, sabun prabot, sabun lantai anak makejang jani suba jangkep misi antiseptik.
Luh Dé	Men sabun manjus ané sai anggon jani ento misi antiseptik masi ae bli?
Gedé	Adah né mara ja, jeg nganggo doén tawanga. Neng baca pa kapah-kapah kulitné naké apang tawang gunané.
Luh Dé	Béh dija maan selah maca men Bli, yén suba kadung ada gaé jeg sing gidang apa buin maca. Ané penting kan carané ngango suba beneh.
Gedé	Ento sabuné sané anggo sesai jani ento anak suba misi masi anti septik Luh. Tuang lipstik dogén tusing misi, kewala ngidang ngaénang méméné tampil cantik.
Luh Dé	Béh jeg semengan enu né bli, misi ngerayu kéto. Kayeh dogén kondén ené suba lengut semengan.
Gedé	Arus keto apang maan makedékan. Apang sing énggal uban bok nyan Luh.

 

Puput.

Olih; I Wayan Kertayasa - https://babakanpole.blogspot.com/