Cerpen bahasa Bali "Ketara"

Nemonin peteng mapag redité langité terang-galang di beduwur kasunarin sinar bintang-bintang lan bulané. Rumasa liang nyaputin manahnyané Sekar duk Roi nyambatang tresna tekén ipun.

Kadi tusing ada sebet sané karaseyang dimanahnyané. “Luh, uling mekelo suba atiné puyung, kéwala jani suba ngidang mekenyem ulian iluh suba enyak mumpunin atin bli aji tresnan iluh”. Lemuh rayuanné Roi suba nganyudang manahnyané Sekar nganti ka panepi ipian.
Yén raseyang buka guminé tuah gelahang ajak dadua dogén ulian demené bas kaliwat. “Tiyang anak sujati sayang masi tekén beli”. Kénten wacana panguntat Sekar sedurung sirep ring pasaréan sambilang ngayalang sawang-sawang muané Roi.
Sagét galang suba genah parisepané Sekar ulian suryané suba endag uling sisi kangin nembusin jendélané. Laut megegésoan ipun bangun tur ngénggalang kayeh.
“Kring............”, suaran bél mengaso kantornyané Sekar sané makuli di toko. Ngénggalang ipun sareng Tiwi timpalné melaib nuju dagang rujak sané paek uling tongos ipun megaé.
“Mbok, rujak dadua sareng és téh dadua”. Kéto Sekar ngamprah rujak tekén dagang rujaké.
Sekar mekita nraktir Tiwi, santukan ipun mangkin rumasayang demen sampun ngelah tunangan. Pakrupuk ipun ngorto sambilang ngantosang rujuakné. “Andra tunangan ragané engkén gatrané?”. Kéto Sekar nakonin Tiwi. “Ah raga montoan dogén, mara duges puan tiang melali ajak dadua ka pasisi Kuta”. Kéto tiwi nyawutin.
“kring...., kring...,”. ngenggalang Tiwi ngambil Hp-nyané. Duk nika wénten telpon sakéng semetonyané sané megaé di Kuta. “nyen ento Tiwi?”, Sekar nakonin. “é linda né...”. Sawut Tiwi.
Linda nélpon Tiwi santukan ipun lakar ngajakin Tiwi kundangan bin nyanan sanjané sik timpalné sané ngantén. Linda niki masih kantiné Sekar duk sekolah SMP dumun, kentén masi Hendra sané lakar ngantén niki mekanti sareng Sekar duk ipun ngeranjing ring SMA.
“Nyanan tiang masi lakar kundangan sik Hendrane”, kéto Sekar nyambungin Tiwi disubané suwud nelpon. “yéh yen kéto, barengan dogén nyanan. Ajak tunangan baruné nah..., tiyang kal ngajak tunangan tiyang masi nyanan, 😊😊😊”. Kéto tiwi ngajakin Sekar.
Rikala sampun dawuh lima sanja, I Koplar kosek nyurat sms di jumahné. Jeg buka lindungé uyahin, tusing ngidang ngoyong-ngoyong. Negak, nyongkok, maebahan jep biyin nyelélég di temboké.
“aduh, kénkén bedik carané ené?”, kéto Koplar ngamimik.
Ipun tusing ngoyong-ngoyong. Biyin sms, biyin Facebookan, misi BBM-an tur kéto masi twitteran. Jeg kosek buka dadi anak pengedé dogén.
Kocap Arik tunangan ipun sané paling sayang nelpon ipun ngajakin kundangan sik Sutri sané jagi ngantén ngajak Hendra. Duk nika Koplar langsung ngorang nyak.
Ring genahé sané tiosan, Linda, Tiwi, Sekar masi iteh nelponin tur SMSin tunangannyané soang-soang. Telponé Linda jeg pragat mailbox. Kéto masi Tiwi, SMSnyané tusing kawales-wales olih Andra. Napi malih Sekar sane sampun ngedilin nelpon Roi, kewala tusing kaangkat-angkat olih Roi.
Ulian telponé Tiwi tusing kangkat-angkat olih Andra, ipun langsung nelponin Sekar. “Halo...., Luh nyanan tiang buwung ngajak cowok tiangé, santukan telpon tiang tusing kangkat olih ipun. Minaban ipun kosek tur tan sida minab nyarengin tiyang kondangan”.
Sekar taler nyambatang tekénin Tiwi yening Roi tunangan ipun minab tan sida lakar nyarengin dewekné nekain undangan. Duk nika, ipun sareng kalih durus mejanji lakar nekain undangan sareng-sareng ajak kekalih kéwala nénten kasarengin tunangannyané.
Nénten sué ipun ngadungan janji, raris Linda teka ka jumahné Tiwi padidian. “ais..., sagét suba jegég ya wuih...”, kénten Tiwi nyapatin Linda. “Ah raga kal kundangan, kan mula harus mapayas bedik, 😁😁😁...”. saut Linda tekén Tiwi.
“Linda, dadi padidian? Sing ngajak tunangan?”. Kéto Tiwi nyambungin. “Arah, tiang jeg gedeg sajan baana tekén Toni, santukan suba ada pang keti bangsit nelponin ipun lakar ajak kondangan, kéwala jeg tusing angkat-angkta tekén ipun. Yén tusing kéto, méh suba langsung ngajak ipun dogén tiyang kemu”. Kéto Linda nuturang déwéknyané sané tusing ngidang ngajakin tunangané nékain undangan. Sakéwala santukan ipun rumasa madué pikobet sané pateh, ipun durus ngerereh Sekar apang ada ajak bareng-bareng nekain undangan Hendra.
Disubané mekelo Tiwi, Linda sareng sekar neked di jumahné Hendra, raris ipun sareng tiga sareng-sareng kairing ngajeng olih pengantenné. Yén kénkén kadén unduké, Tiwi jeg sing ngoyong-ngoyong, kipak-kipek pedidian. Saget tepukina ada anak lakar pamitan sareng anténé. “Sangkal carah i Andra jeneng anaké totonan nah?”. Saget bangun tiwi tur buwung ngajeng.
“Ngajeng suba malu enah, tiyang lakar pesu kejep santukan ada makutang di motoré puk”, kéto Tiwi nyambatang tekén kantiné sareng kalih sané kari ngajeng.
Ada biyin duang dasa angsel, “Linda, adi makelo Tiwi ngorang pesu nah?”. “ajaan puk, mai ajak delokin pesu mi”, kéto lantas Linda ngajakin Sekar sané nakonang Tiwi. Raris ipun sareng kalih ka sisi nyagjagin I Tiwi.
Di subané neked di sisi; “Roi.......!”, keto Sekar ngaukin tunangané. Kéto masih Linda “Toni.....!”, nylengking munyin ipun nyeritin tunangané. Panyingakan tur tujuh ipun sareng kalih nuju sik Koplar sané sedeng merebat sareng Tiwi lan Sutri. Laut ipun sareng kalih nyagjagin Koplar.
Aruh..., jeg nasib jelék jani nibénin Koplar sané dadi muani buaya. Ajan anak buaya, jeg dueg baana madaya. Yén kénkén kadén papat anak eluhé aluh banna nguluk-nguluk, biyin sadé sané ajaka tetelu; Linda, Tiwi lan Sekar anak mekanti ipun sareng tiga.
Tuah mula buayé, adan dogén liu ngelah. Minab apang sukehan ketara yén ngelah tunangan elénan. Jep Roi, yén ajak linda dadi Toni, kéto masi ajak Tiwi biyin ngelénan adan dadi madan Adra. Nyak suba kéweh katara yén liu ngelah tunangan.
Sakéwala amongken ja dueg semalé mekecog, pasti kal taén ulung. Né jani suba I Koplar buka nakep balang papat, jeg sambrag konyang. Tusing ada anang besik ané bakatanga. Tuah sajan buayé sané mapaawakan lobo. Bungutné dogen gedénang tekén awakné, dija ja kanggoangé yén maan besik. Kéwalé lacur, buayané jani kena jaet. Buka anak nekepin andus, amongkén ja duegné anaké sané ngengkebang jelekné pastika sampun lakarang ketara. Payu mekenta ipun ulian lobana.

Puput.

Olih; I Wayan Kertayasa - https://babakanpole.blogspot.com/