Cerpen bahasa Bali "Panesin Bulan"

Semengan undap-undap nyabsab lalepitan di bucun tikehé, nuju saniscara nemu pinanggal muda. "aduh anggehan kondén mebayah né.....!".

"Man..., apa goréngin ento? dadi énggalin lebengin man?".
"Né kerikan ban bli".
"Buik, kénkén maksud kurenan raga ngorang ngoréng kerikan ban nah. Bes métro kékén jamané ené, adi jeg kanti kerikan ban dadi daar.
"Yén dadi bé siap goreng Man".
"Uahem............", mata kiap sing ngidang nangehang, pulesang sing nyak pules. meceki dibi sanja kalah. Gajih alih di kékét telah di dangsah, "Jeg aéng kéwehné ngalih sarin peluh....".
"Bli sing bangun endén to?".
"Kondén man, mata kiap, basang seduk misi bungut kuang kopi né".
"Bli kénkén keneh bli ento? Ané cén kal isinin bli to? Nginum kopi, ngajeng, utawi nutugang mesaré?'
"Ngajeng luh....."
"Nah tutugang ba malu mesaré"
Megerus ngedeng saput, jeg anget gati sane idupé. Né mare ja kurenan ngerti adané, ngorang seduk jeg oriné nutugang pules. Tau tekén kurené seduk, Nyoman megegésoan megronténgan di paon. kesyur......., jaen boné gegorégan Nyoman. " Né mare ja dedaaran nasi adané".
Sawetara ada di telung dasa angsel; " Bli, bangun malu, niki ajeng malu nasiné satukan tiang suba suud ngaé daaran nasi"
"Apa daaran nasi luh?'
"Né bé siap"
Sépanan bangun lantas ngerapu; "Jaen sajan man, imbuhin arés né man".
"Jaen Bli?
"Jeg top né Man"
 "Bli masi dueg bli"
"Dueg éngkén Man"
"Bli nawang tiang sing ngelah pis bliang daarang nasi, jeg kurungan abang bli tiang dibi sanja".
"Artiné......?"
"Kurungan ento anggo tiang daarang nasi...."
Aruh cak bandare né........, né mara jeg jangkep suba jani pejalanné. Kurungan ané kal adep anggo mayah cicilan motor dadi pangilangan seduk. " Dija bli ngalih uleh-ulehan né Man?".
Pedih sing bani, ulian bakat orin ngoreng bé siap busané.
"Engkén né man?"
" Engkén, éngkén maksud bli?"
"Sangkal bisa ngelah papineh ngoréng kurungan bli?
"Kan bli ngorang sing nyak naar kerikan ban tuni".
"Men bes kerikan ban ngorang goréng Nyoman tuni to......".
"Ento kan ulian sebilang bli maan pis, jeg pragat ngorang anggo mayah cicilan motor, sing jeg ban motoré kerik-kerik ajeng bli".
"Péh berat né...."

(Puput)

Olih; I Wayan Kertayasa - https://babakanpole.blogspot.com/