Mén Sugih tekén Mén Tiwas | Satua Bahasa Bali - Kumpulan Dongeng Bali

Ada katururan satua Mén Sugih tekén Mén Tiwas. Mén Sugih anak sugih pesan, nanging demit tur iri ati, jail tekén anak lacur. Mén Tiwas buka adané tiwas pesan, nanging melah solahné, tusing taén jail tekén timpal. Mén Tiwas geginané ngalih saang ka alasé lakar adepa ka peken. Nuju dina anu, Mén Tiwas ka umah Mén Sugih ngidih api.

Ditu Mén Sugih ngomong, "Ih cai Tiwas, alihin ja icang kutu, yén suba telah kutun icangé, nyanan upahina baas".

Laut Mén Tiwas ngalihin kutu Mén Sugihé. Suba tengai mara suud. Mén Tiwas upahina baas acrongcong, ngénggalang lantas baasné abana mulih laut jakana.

Mén Sugih jumahné buin masiksikan, maan kutu aukud. Ngénggalang ia ka umah Mén Tiwasé, laut ngomong, "Ih cai Tiwas, ené icang maan kutu aukud, jani mai uliang baas icangé ituni".

Masaut Mén Tiwas, "Yéh, baasé ituni suba jakan tiang".

Masaut Mén Sugih, "Nah, ento suba aba mai anggon pasilih!". Nasiné ané makiré lebeng ento laut juanga konyang ka panciné abana mulih baan Mén Sugih.

Nyanané buin teka Mén Sugih, "Ih Tiwas, tuni Nyai ngidih api tekén saang icangé". Lantas api tekén saangé apesel gedé juanga baan Mén Sugih. Mén Tiwas bengong mapangenan baan lacurné buka kéto.

Buin maniné, Mén Tiwas tundéna nebuk padi baan Mén Sugih lakar upahina baas duang crongcong. Mén Tiwas nyak nebuk kanti pragat, upahina baas duang crongcong, laut encol mulih lantas nyakan. Mén Sugih lantas nyeksék baas, maan latah dadua.

Encol ia ka umah Mén Tiwas laut ngomong, "Ih Tiwas, ené baasé enu misi latah dadua, jani uliang baas icangé, yén suba majakan ento suba aba mai".

Sedek dina anu Mén Tiwas luas ka alasé, krasak-krosok ngalih saang. Saget teka Sang Kidang laut ngomong, "Mén Tiwas apa lakar alih ditu?" masaut Mén Tiwas, "Tiang ngalih saang tekén paku".

"Lakar anggon gena ngalih paku?", Sang kidang matakon.

Masaut Mén Tiwas, "Lakar anggon tiang jukut".

"Ih Tiwas lamun nyak Nyai nyeluk jit icangé, ditu ada pabaang nira tekén Nyai!"

Lantas Mén Tiwas nyak nyeluk jit kidangé, mara kedenga, limané bek misi mas tekén selaka. Suud kéto Sang Kidang ilang, Mén Tiwas kendel pesan lantas mulih. Teked jumah ia luas ka pandé ngaé gelang, bungkung tekén kalung.

Mén Tiwas jani sugih nadak, pianakné makejang mapanganggo bungah, lantas ia pesu mablanja. Tepukina Mén Tiwas tekén Mén Sugih. Delak-delik ia ngiwasin pianak Mén Tiwasé.

Buin maniné Mén Sugih mlali ka umah Mén Tiwasé matakon, "Ih Tiwas, dija Nyai maan mas selaka liu?". Masaut Mén Tiwas, "Kéné embok, ibi tiang luas ka alasé ngalih saang tekén paku lakar jukut, saget ada kidang, nundén tiang nyeluk jitné. Lantas seluk tiang, mara kedeng tiang limané ditu maan emas tekén slaka liu." Mara ningih kéto. Mén Sugih ngencolang mulih.

Maniné Mén Sugih ngemalunin luas ka alasé, Mén Sugih nyaru-nyaru buka anak tiwas, krasak-krosok ngalih saang tekén paku.

Saget teka Sang Kidang, "Nyén ento krasak-krosok?".

Masaut Mén Sugih, "Tiang Mén Tiwas, uli puan tiang tuara nyakan". Mén Sugih kendel pesan kenehné.

Lantas masaut Sang Kidang, "Ih Tiwas, mai seluk jit nirané!".

Mara kéto lantas seluka jit kidangé, laut kijem jit kidangé, Mén Sugih kapaid abana ka dui-duiné. Mén Sugih ngeling aduh-aduh katulung-tulung, "Nunas ica tulung tiang, tiang kapok!".

Teked di pangkungé mara Mén Sugih lebanga, awakné telah babak belur tur pingsan. Disubané inget ia magaang mulih. Teked jumahné lantas ia gelem makelo-kelo laut ngemasin mati.

(Puput)

 Olih: I Wayan Kertayasa - https://babakanpole.blogspot.com/