"Makikén telung warsa suba liwat nyalanin sekolah ring SMA jani nénénan. Sagét jani suba puput, yéning kenehang buka anak ngipi asané. Galah sané jalanin ada manah liang lan ada masih manah sebet di atiné. Sakéwala tusing kénkén, ené jani anggon bekel déwéké riwekasan". Ngetel yéh peningalan Karsa tatkala ngingetang déwékné sané jani lakar mapalasan ngajak tresna lan sawitrané sané ajak masekolah. Doh pajalané sané kaliwatin ipun ngantos jani ipun ngidang muputang sekolahné, buina anak tusing ja élah baan ipun ngantos mangkin puput masekolah antuk asil sané tusing main-main. Mangkin ipun ngidang muputang lan ngamolihang wantuan beasiswa kuliah kedokteran ring dura negara. Indik puniki tusing ja wantah ulian aget, sakémanten kasarengin prastiti bhakti lan utsaha sané ulet. Tusing ja cepok pindo ipun mautsaha, tusing ja tuah duang wuku ipun utsaha, sakéwala telung warsa sampun ipun mautsaha. Mula saja yéning ada utsaha sinah pacang ada asil.
Karsa wantah ja murid sané ngendon saking desa laut masekolah ka negarian. Indiké niki sangkaning pituduh kaluarga ipun sané taler makisid nongos ka negarian santukan bapa ipun molihang genah mekarya ring negarian. Ipun sujatiné anak polos tusing ja sanget nawang prakantin ring negarian. Duk ipun mara nyumunin masekolah di sekolahan sané anyar, dahat ipun molihang timpal-timpal sané anyar. Akéh sampun soroh timpal ipun sané anyar punika, ada sané pianak DPR, pianak pangusaha lan sané tiosan. Ratan sampun timpal ipun metu saking kaluarga sané sugih-sugih.
Liwat suba a wuku ipun masekolah, laut liu sampun ipun ngelah timpal. Ada sané polos sajan ngajak ipun, kéto masih ada sané jeg demen sajan ngwalék ipun. Duk ento rahina soma ring sekolahan Karsa tusing ja nyelapang bakat ngango sepatu putih. "Eh Karsa, cai tong tusing nawang rahina? Ngudiang rahina soma jeg nganggo sepatu putih? Buina misi kumbel kéto gobané, tusing nawang elek apa cai?". Kéto Arta metakon sambil nyacadin sepatuné Karsa. Buina timpal-timpal ipun bareng ngedékin. "Béh tusing nyelapang icang nganggo sepatu nénénang, unduké ené ulian anak nénénang dogén icang ngelah". Keto ipun nyautin.
"Bah..., 😄😄😄mebekel naké bedik masuk. Tusing elek apa cai nganggo sepatu carah keto. Ento anaké tolih timpal-timpal sané elénang, anak konyang melengis sepetauné buina makejang mael-mael. Tusing kené apa carah sepatu cainé nénénag, jeg carah sepatu aba anak ka uma. Ajan anak medasar tani ajan. Tusing cocok asané mai masekolah, ngelek-ngelekin sekolahané dogén". Kéto timpalné sané elénan nyautin lan nyacadin. Karsa rumasa mekleteg ngenehang dewékné. Yéning rasanga uling munyin timpalné ento tusing ja munyi-munyi sané pantes matimpal sakéwala munyi-munyi nyacadin. Laut ipun siep tusing nyaut anang bedik. Timpalné sané elénan iteh ngedekin ipun sambilanga ngalahin laut misi ngenjekin sepatuné.
Buin Karsa ngingetang dewekné jani, ada manah sebet lan ada manah egar santukan mangkin ipun sampun muputang sekolahané antuk rahayu. Sambil makenyem ipun buin ngingetang dewekné sané liwat dugesé disubané nyumunin kelas kalih ring SMA. Ditu ipun kena walék lan kena pisuna. Indiké niki mula ja neket sajan ring ati ipun santukan keliwat pisan sebeté sané karaseyang duk ento.
Duk OSIS SMA sedek mapupul ring balé osis sedeng mlibagang lakar ngawéntenang sidak ring sekolahanané. Lan murid-muridé sané tiosan sampun mapunduh mabaris ring natah sekolahané. "Lé..., dija ejang cai arak sané aba tuni?". Kéto Arta nakonang timpalné sané sesai ajaka kalu ring sekolahan. "😋😋😋 Ha..., ha..., ha... suba atur icang apang raga selamet uling sidaké. Jeg raga aman pokokné, tenang dogén. Nganteg roko lan slokiné suba slametin icang 😄😄😄". Arta, Tolé lan timpal-timpal osisné kedék ngingkel.
Laut lantas guru-guruné nyumunin sampun panureksan murid-muride ring natah sekolahané. Murid sané muani maebok lantang kapupulang di arep barisan jagi kagunting ebokné. Kéto masi murid-murid sané istri-istri sané mabaju gantut kapupulang diarep, pacang kaicén pawarah lan panuntun sumangdané sida sayan mecikan parisolahné tur trepti mawastra. Tiosan punika, OSIS sané tiosan lan kedampingin guruné sané tiosan nuréksain makejang méja murid ring soang-soang kelasé antuk mastiang apang tusing ada murid sané ngaba baban tidong-tidong ka sekolahan, sekadi prabotan sané nénten maanggé ring sekolahan.
Laut lantas suba makejang matureksain, murid sané nénten keni sidak kadurusang mewali ka kelasné nutugang plajahan. Murid sané nglémpasin tekén awig sekolahané kalanturang kaicén pawarah lan tatuladan olih guruné ring natah sekolahané sambilanga majemuh. Duk nika ada sané soléh, santukan Karsa sané nénten wéntén nglempasin utawi nungkasin awig sekolahané laut kakerabin apang nuju bale guruné ring bucu kangin. Ipun makesiab lan paling. "Ngudiang bli orahin ka balé guruné bli?". Kéto Latri matakon tekén Karsa duk mejalan nuju kelasne wusan mabaris. Sambilanga malipetan nuju balé guruné, Karsa ngorahang " Tusing tawang masi, anak ada apa kadén nénénan, enah tiyang kemu dogén malu apang tawang ada apa ja sujatiné". Laut Karsa majalan nuju balé gurune di sisi kangin. Kéto masih Latri nutugang majalan nuju kelasné.
Suba ada liwat telung palet paplajahané majalan ring kelasné nglantur makikén galah ngaso, Karsa masih kondén teka uling balé guruné. Latri rumasa ada ané tusing beneh nibenin Karsa. Makudang-kudang pangadi di kenehné Latri ngantos ipun tusing ngidang nyulengang kenehné nyarengin plajahané sané majalan ring kelasné. Ngantos galah ngaso sawetara dawuh dasa, Latri nénten ja sekadi biasané nuju warung sekolahné ngajak timpal-timpalné. Ipun majalan padidian mengkeb-mengkeb nuju balé gurune ka sisi kangin lakar mapagin Karsa apang ipun pedas nawang apa sujatiné sané nibenin Karsa, ipun ngrastiti sumangdané nénten keni pakobet sané jelék lan tusing biasané Latri buka kené.
Duk Karsa nyumunin masuk ring sekolahan ento, Latri sampun ja sesai nepukin Karsa ring sekolahan, kéto masih ipun anak dadi besik kelasné ring sekolahan. Sakéwala Latri puniki anak mula ja anak dueg sajan ring sekolahan. Yening indik abah-abahan Latri puniki wantah ja anak itri mautama ring sekolahné. Liu murid-murid lanang sané demen ngajak ipun, sakéwala ipun anak mula ja wantah anak istri sane milihin pisan timpal sané seken-seken kaajak matimpal. Tumbén jani ipun rumasa paling digantiné Karsa rumasa katibén baya. Yéning telehin uling sedurungné, ipun anak ngenahné tusing ja sanget pisan paek ngajak Karsa. Patuh buka solahé ipun matimpal ngajak timpal-timpal lanang sané elénan. Tusing ada uratian sané lebih majeng Karsa. Sakéwala mangkin tumben ipun ngenah sajan makita nyekenang kawéntenan Karsa ring balé guru. Ngenah sajan ipun edot nawang sujatiné ada keénkén majeng Karsa.
"Wan..., nawang umahné Karsa?". Kéto Latri metakon tekén Iwan dugesé ipun suba mewali uling balé gurune. "Bih anak ngudiang nakonang umahné Karsa?", kéto Iwan nyautin. Indiké niki lantas kapireng olih Alit sané bareng mapupul ring warung sekolahané. Sambilanga ngajeng, Latri lan Iwan mablibagang ngajak dadua lan kadingehang olih anaké makejang ring warungé. "Yéning umahné tusing tawang tiyang dija kadén ipun ngoyong", kéto pesautné Iwan digantiné takona di panguntat satuané ring warung sekolahané. Iwan ngusahang ngengkebang genah ngoyongné Karsa majeng timpal-timpalné sané elénan, santukan ipun suba majanji sareng Karsa sané nuduhin apang tusing ngorang tekén enyén-enyén indik dija Karsa ngoyong ring negarian ento. Iwan makleteg bayuné "Anak ngudiang tumben Latri nakonang umahné Karsa nah? Yéning telehin anak tusing ja taén sanget pati rungu asané ipun ngajak Karsa. Iwan sané dadi timpal paekné Karsa sané sesai ajaka negak di kelasné ento rumasa paling. Duk nika Latri laut magésoan mabayahan ring warungé lan mewali malih ka kelas ipun. Iwan sané kari ring warung ngajak timpal-timpal sané elénan laut nutugang ngajeng.
"Wan anak ada apa Latri ngajak Karsa?, kéto petakoné Alit tekéning Iwan sané mirengang pablibagan ipun wusan. "Bih tusing tawang tiyang masi bli", Iwan mesaut masebeng paling. "Bah seken naké Wan, cai eda bogbog ngajak Alit!", keto Artha nimpalin nyambatin Iwan. "Cai nawang ento bos awaké Alit suba uling mara nyumunin masekolah dini edot sajan ngajak Latri, Melahang téh. Yén kanti Karsa ada apa-apa ajak Latri, sinah baya pacang Karsa di sekolahan ené", kéto Candra buin ngimbuhin. Iwan buin rumasa ketug bayuné, santukan Karsa mula sabilang wai kakencanin olih timpal-timplane ento. "Suba orahang icang tusing nawang, bli ja nawang Latri carah kénkén. Nyén ngidang lakar nganggo gegelan? Apa buin Karsa, asané ejoh para asané ngajak Latri yening nganti ada paiketan lebih tekén matimpal. Anak mecapatan dogén kapah tepuk ngajak dadua ento", kéto Iwan negesin ssantukan mula sujatiné pangenahné lan sané tawanga ngajak Iwan.
"😂😂😂.., asliné suba Karsa kapok jani masuk ento", kéto Tolé nyambatang tekén timpal-timpalné diarepné Iwan. Makejang kedék ngedékin kawéntenan Karsa. Iwan sané enu ditu rumasa paling "Anak kénkén ladné, sangkal bisa kéto?", kéto Iwan matakon. "Cai tusing nawang timpal cai ento suba kena jebag awaké ajak konyang. Ento tuni semengan awaké ngajak Candra ngejang arak di laci mejané lan mempenin roko etasné Karsa, nganteg slokiné kaejang ditu. Pastika suba tuni ento Karsa orahina ka guru BK. Asli kapok jani ento 😂😂😂", kedék konyangan timpalné Alit ulian ngidang ngaénang Karsa kena pikobet ring sekolahané. "Pantes suba ipun kena pikobet, apang kapok masuk dini. Anak mula tusing cocok asané Karsa masekolah di sekolahan dini. Tingalin anaké bajuné uling pidan nyumunin masekolah dini jeng lusuh. Kéto masih gobané jeg ngedegin sajan. Baang suba apang Karsa kapok masekolah dini, yéning ngidang apang suwud ipun masekolah dini. tusing cocok raga ngelah timpal sané modél anak gunung kéto. Joh para ajak padéwékan raga dini, masekolah ngaba motor utawi paling tusing maateh lan kapapagin. Men yéning karsa menék tésien, asin suba lusuh jenengné neked di sekolahan lan boné sabilang neked di sekolah meadukan ngajak ebon anus tésiené 😂😂😂", kéto timpal-timpalné nyelékang Karsa di arep Iwan.
Nepukin unduké ento, Iwan laut ngénggalang ngajeng lan énggal-énggal mewali ka kelasné santukan suba galahné nyumunin paletan plajahan selanturanyané. Sambilanga majalan nuju kelasné, Iwan makeneh "Béh nyajang sajan timpal-timpalé nénénag, bes keras ngencanin Karsa. Bes uling anak mara makisid nyumu masekolah dini suba uyak anak kéné-kéné. Sakéwala asané Karsa ngidang nangehang unduké nénénang, Nah astungkara nyan ipun tusing kenapa-kenapa", kéto Iwan di atine ngrastitiang Karsa.
Gelisang satua énggal, suba ada a wuku lebih Karsa nénten ngranjing ka sekolahan sapanguwusang unduke Karsa ka bale guru ento. Latri sané mengkeb-mengkeb sabilang wai ngantiang Karsa ring kelasné rumasa inguh ipun nénten nepukin Karsa. Iwan sané naenin ka umahné Karsa duk duang dina sané suba liwat masebeng tusing nawang apa santukan ipun makebang sapetuduhné Karsa. Iwan nletekin solahné Latri duk nyumunin Karsa keni pikobet ring sekolané ento, tuah ja ada sané elén sané tusing carah biasané. Nyumunin indiké ento Latri stata kipak-kipek masledétang ka mejané Karsa rumasa ngintipin. Kéto masih Latri nénten ja ngidang suleng nuwutin paplajahan sekadi biasané. Ngenénin indiké ento Iwan tuah ja siep mantén, tusing ja juari metakon sareng Latri santukan ipun jejeh Karsa pacang keni baya malih saking timpal-timpalné Alit yéning kanti ketara Latri ngortang Karsa.
Tusing nyelapan sedek Iwan makita ka pabasehan santukan nagih ngenceh, majalan ipun ka arep nuju jelanan kelasé lakar pesu. Sedek liwat ipun di selagan mejané Latri, kadapetang ipun maca lepitan buku sané misi sasuratan pinanggal 08-10-1991, ditu kasledetin olih Iwan misi ngenah cakepan genah Karsa nongos. Iwan sané majalan nyaruang ngintip laut nglanturang nuju jelanan kelasné. Neked disisi ipun majalan nuju pabasehan sambilanga makeneh "Ngudiang ja Latri bisa ngelah cakepan genahné Karsa nongos nah?", kéto papinehné Iwan. Laut ipun makleteg "Yéh saja yéning petekin duk pinanggal ento yéning tusing pelih nyumunin Karsa masekolah dini. Yéning tusing pelih ento dugesé Karsa nyaduang dewék ring arep kelasé majeng timpal-timpal di kelasé", kéto ipun ring atiné. Kéweh ban narka kawentené puniki, Latri sané alep ayu lan dueg punika sujatiné suba uling pidan nguratiang Karsa. Mula ja saja yening uling abah-abah anak ejoh sajan. Latri ento stata alep yening ka sekolahan, tusing ada apa daki aneng bedik ngenah ring penganggané lan déwékné. Tusing melihang yéning ipun dadi bungan sekolahé dini. Makejang anak lanang pasti suba ngetél ningalin ipun, apa malih ipun dueg sajan ring peplajahan sekolahé sané sabilang ketus sméster ipun manggihin utawi dados jawanti siki ring sekolahan. Minab tusing ada kuangné asané yening dadi anak bajang. Joh sareng Karsa sané tuah maabah-abah apa adané, tusing pati rungu tekéning kawéntenan penganggané. Asel suba ngidang nganggo, ento suba anggona, diapain lusuh tetep ipun tusing ja ngarungu. Sakéwala yening telehin uling kaduegan, Karsa mula ja anak jeg dueg masi ring paplajahan. Lebihné Karsa nénénan tusing sombong carah timpal-timplané Iwan sané elénan, kéwala jelék sajan pejalané masekolah dini sané sabilang wai gaénina pikobet tekén timpal-timpalné Alit.
Sekadi biasané suba dawuh siki, sampun galah muridé medal uling sekolahan santukan galah sekolahan sampun puput ring dina ento. Latri sampun kapagpagin olih pangayah bapané antuk mobil sané biasané kaanggon mapagin. "Pak jani eda suba mulih malu, tiyang suba ngorang ngajak bapa lan mémé tuni, yén jani tiyang lakar ada pesu kejep, nyanan sanjaan mara ja tiyang mulih", kéto ipun nyambatang tekén pengayah bapané ento. "Beh yéning ngatehang cening nganti sanja, tiyang tusing ngidang santukan bapa cening buin a paletan galahé lakar nuju bandara, tiyang lakar ngateh bapa cening ka bandara", keto pengayahné nyautin Latri. "Enah lamun kéto, tiyang lakar menék tesien dogén apang tusing bapa tiyang kabanda galahné ka bandara ulian bapak ngatehin tiyang", kéto Latri ngorahang teken pangayahné.
Latri nuju genah ngantiang tésien sané biasané Karsa negak ngantiang tésien. Ditu seka besik sopir tésiené katakonin olih Latri sané nuju genah sané ada di cakepan ipun ento. Kanti ada limang sopir sané marérén bakat katakonin, mara ipun maan sopir tésien sané nuju genah sané manutin cakepan punika. Laut Latri menék ka tésiené ento. Indiké niki sané kapertama Latri menékin tésien, Ipun rumasa angob ningalin anaké sané numpang ditu. Anak sané numpang ento macampuh, ada kuli, ada dagang, tukang suwun sané mulih uling pekené lan ada masih anak sané sedeng lakar melali. Makalukan suba di tengah tésiené ento, Latri rumasa tumbén ngasanin ongkeb tur kanti peluhan numpang. Sakéwala ipun tusing ja rumasa nyesel santukan ipun suleng kenehné lakar nuju umahné Karsa.
Sawetara suba dawuh kalih ipun neked di tongos sané katuju. "Om swastyastu....", kéto ipun nyelang mekaukan uling sisin pagehan umah di arep jelanan pagehan. Laut wénten anak ibu sané ngampakin ipun jelanan di arep. "Cening sira, jagi ngerereh sira cening mriki?", kéto ibu matakén tekén Latri. "Tiyang Latri bu, kantiné Karsa ring sekolahan", Latri nyelang nyautin. "Oh..., inggih mriki dumun ngranjing. Kanggéang kawéntenané sekadi puniki. Karsa kari ring durin umah wawu, makin jagi kagelunin dumun. Gék durusang melinggih dumun driki, jantos jebos", kéto sang ibu ngorahin Latri ngantosang di kursi arep ambén umané. Latri sané negak tusing ngoyong-ngoyong paingalané masledétan. Ditu ipun nepukin meja cenik-cenik ada aneng dasa matumpuk apik pisan. Kéto masih ipun ningalin ada rak lantang kedas apik misi buku-buku akéh. Di sampingné ada papan guratan cenik ané misi kapur guratan lan papané misi lad tulisan wilangan itung-itungan anak cerik-cerik, kénten masih kedas lan apik sajan katingalin mahnyané. Rumasa seneng sajan atine Latri wusan saking tésiené sané kebus pitek ento jani maan negak di genahé etis tur kedas di ambén umahné Karsa.
"Cening nyambi nyantos Karsa sané enu mabaseh, niki ada toyo ajak sanganan. Ngiring dumun tunas mangdé segeran malih kidik", kénten sang ibu sané teka uling tengah ngaba sanganan sané sekadi biasané kaaturang yening ada tamiyu rauh ka umah ipun. "Inggih buk, niki tiyang tunas. Ampura ibuk niki ibunyane bli Karsa nggih bu?", kénten Latri nyelang sambilanga metakén tekén sang ibu punika. "Inggih cening, tiyang sampun ibuné Karsa", kénten kecawisin. Laut lantas ibuné Karsa nglanturang nyatua indikné Karsa sané sampun nénten masekolah kuang lebih sampun awuku lebih. Ibuné maosang yéning Karsa ada manahnyané lakar makisid masekolah, santukan ipun sesai sampun keni pikobet ring sekolahan. Indiké niki buka pituduh bapanyané sumangdané Karsa ngidang suleng nglanturang sekolahnyané. Mangkin Karsa enu ngurusang surat-suratné lakar ngaturang makisid ka sekolahan sané lianan, ento ngawinan ipun nénten masekolah suba lebih tekén a wuku. Nglantur ibu ipun maosang "Minab yéning néten malih kalih rahina Karsa jagi mepamit majeng guruné di sekolahané". Yéning uling Karsa pedidi anak tusing ja sanget kenehné lakar makisid masekolah malih, santukan anak suba buin bedik dogén suba sida puput. Sakéwala ulian suba bas kaliwat pikobetné ngantos ipun polih maseselang ring jumah laut ipun kapadalem lan katundung olih bapané apang makisid manten diastun buin akejep.
"Ibu ampura sadurung nglantur, sujatiné napi sané ngawinan Karsa katundung makisid masekolah?" kéto Latri nyelang pablibagané. "Nika dugesé wukune lintang ipun keni kencal lan pisuna saking sawitrané ring sekolah, ngantos guruné ngenter ipun mewali budal semengan uling sekolahan", kéto ibu ipun maosang. Duk nika Karsa keni jebag saking timpal-timpalné di sekolahan ngantos karauhin ka guru BK lan laut kaenter budal ka umah ipun. Santukan sampun bas sanget solah timpla-timplané, ento mawinan bapané tusing terima tekén kawéntenan pianakné laut ngorahain Karsa apang makisid manten masekolah. Duk nika taler laut kablibagang olih bapa ipun sareng guru-gruné sané ngateh Karsa mulih laut prasida kacumpuang apang Karsa ngidang suleng nglanturang sekolahné. "Men ring sekolah dija bli Karsa lakar makisid sekolah bu?", kénten Latri nakonin. "Ipun ngorang ring SMA 1", kasautin olih ibuné Karsa. Latri rumasa ngob, santukan sekolahan punika mula ja wantah sekolahan sané sedeng melah sajan. Liu anak megarang lakar ngalih sekolahan punika sakéwala anak meweh sajan. Kocap anak sané dueg-dueg dogén sané ngidang masekolah ditu. Kéto masih yéning telehin uling Kawéntenan sekolahané anak joh luwihan tekén sekolahané Latri sané mangkin. Latri rumasa ngob lan paling, santukan Karsa punika yening tingalin uling parisolahné sewai-wai sané tawang ngajak Latri anak mula ja wantah anak muani sané biasa-biasa dogén. Mangkin lakar makisid sekolah ka sekolah luih, ento ngaénang Latri ngob.
"Ning, mai nuju ambéné di duri. Asané Karsa suba ngantiang ditu, santukan ambéné dini anak lakar anggona mlajah ajak alit-alité di paumahan dini. Apang tusing kagugul, lan mangkin di ambén durin umah laku. Karsa suba ditu palingan ngantiang", kéto ibuné Karsa nimbalin ngajakin Latri majalan ka ambéné duri umahné. Laut sareng kalih nuju ka ambén di duri.
"Dini samun ngajak Karsa dumun nggih ning, ibu lakar nabdabang sarana alit-alité sané sampun makikén rauh mlajah mai", kéto ibuné ngorahin Latri lan Karsa sambilanga ngalahin ipun sareng kalih ka arep. Ipun sareng kalih negak pedaduanan di ambéné duri, sambilanga mabalih ebené nglangi di aquariumé, sareng dadua nyumunin ngorto. "Luh dadi bisa nawang umah tiyangé dini? Iwan ada ngorahang ngajak iluh?", kéto Karsa nymunin matakon tekén Latri. "Tusing bli, Iwan abedik tusing ada ngorahin tiyang. Suba apang mongkén kadén takonin tiyang, tetep ipun ngaku tusing nawang bli. Ené tiyang nawang umah bli uling cakepan tiyang sané pidan polih kasurat tiyang duk bli nyuminin masekolah duk bli nyaduang dewék ring ajeng kelasé", kéto Latri nyautin. Latri laut mesuang cakepané sané jangkep medaging pinanggal lan kertasné suba mesawang kuning. Karsa rumasa makesiab napetin unduké ento. "Dadi tiyang nakonang luh? anak ngudiang iluh bisa nglah cakepan kené luh? Biasané anaké sané tiosan tusing ada apa ngrungu tekén padéwékan tiyang. Napi malih ring sekolahan ento anak makejang demen sajan ngaénin tiyang pikobet, ugig tekén tiyang. Napi malih timpal-timpalé sané lanang-anang, jeg ratan asané tusing enyak matimpal ngajak tiyang. Tuah Iwan sané ngidang ajak tiyang matimpal yening uling timpal-timpal lanang di sekolahan ento, yening ento bakat ingetang anak sebet sajan kenehé. Kémanten depang dogén suba apang tusing dadi lantang, kanggoang suba tiyang jani sané ngalah lakar makisid masekolah". Kéto Karsa nglanturang ortané.
"Bli..., yening dados tiyang ngidih pelih tekén bli. Tiyang tusing ada nyambatang napi tekenning bli indik cakepan genah sané simpen tiyang ngantos mangkin. Sasukat bli nénten malih ka sekolah punika, tiyang rumasa paling, rumasa ada ané ilang asané uling sekolahan. Tusing buin tiyang ngidang suleng miletin paplajahan di sekolahan, sabilang maan selah tiyang terus nyledetin ka genah méja bliné negak. Yéning kenehang miribang sabilang angsel tiyang masledétang. Iseng tiyang bli, tusing ada buin asané sané dadi saingan tiyang ring paplajahan", Latri nyatuang kawéntenané di sekolah. Latri sujatiné sampun uling kapertama matemu sareng Karsa sampun nletekin ipun sané ejoh pisan matiosan ngajak lanang-lanang sané wenten ring sekolahané. Latri tusing ja taén ngawag yening matimpal, ipun pastika sampun minehin alon-alon apang tusing matimpal ngajak anak sané tidong-tidong. Kéto masih ring sekolahané ipun pedas sajan nawang yening Karsa sabilang wai kacampahang ngajak timpal-timpalné lanang. Ento masih ngawinan Latri sané dadi bungan sekolah punika ngengkebang kawéntenan manah ipun majeng Karsa apang Karsa nénten keni uyak sareng lanang-lanange sané mabalapan maekin Latri. "Bli tiyang boya ja elek tekén rasa sané ada di atin tiyangé niki, tiyang tresna tekén bli suba uling makelo. Tiyang tusing bani nekedang tekén bli satukan tiyang tusing enyak ngaénang kawentenan bli nyelekang di sekolahan ulian parisolah timpal-timpalé sané elénan. Ento ngawinan tiyang maling-maling nguratiang bli ring sekolahan. Nemu sampun bli nénten masekolah lebihin tekén awuku, ditu tiyang tusing ngidang naenang manah tiyang, rumasa rindu dewék tiyang diastu tiyang nénten taén nekedang tresna teken bli. Sakéwala suba nénten nyidang malih tiyang naenan rindu, mawinan tiyang ngaénang raga mriki apang ngidang kacunduk sareng bli. Mangkin buin neked dini tiyang nampi orti bli lakar makisid uling sekolahan, rumasa pelih asané tiyang yéning tiyang tusing nekedang tresnan tiyang niki. Mangkin tiyang rumasa ngaturang suskma wiréh sampun polih tiyang nyambatang tekén bli indik tresnan tiyangé, diastu bli tusing karuan lakar nyidang nampi", Latri mesaduang isin atiné tekén Karsa.
Karsa sané nénten madaya tekén unduké ento, laut nampekin Latri lan ngusapin yéh peningalan Latri sané ngalimbeng tanpa naen. Sedih Latri kaliwat laut sambil ngeling nyambatang "Ampurayang tiyang bli indiké sané suba liwat di sekolahan, akéh bli polih pikobet saking timpal-timpalé sakewala tiyang nénten ngidang nulungin napi-napi. Tiyang wantah ngidang nguratiang bli manten", kéto Latri malih negesin sambil nyeleleg di palané Karsa. "Luh, sampunang ento sané suba liwat buin lantangin. Yéning sambatang bli anak mula sedih asané yening kacampahin tur kacadin olih timpal-timpalé di sekolahan, sakéwala bli enu ngelah mémé lan bapa sané stata nandanin bli apang ngidang ngliwatin indiké ento. Yéning baosang sakit ati, ento suba sakit ati. Sakéwala mangkin bli sampun ngaksamayang makasami. Makin bli lakar makisid msekolah apang ngidang bli ngengsapang makejang sané jelék lan apang bli ngidang nyulengang manah muputang sekolahan bli. Ampurayang bli nénten nyambatang indiké niki, santukan bli nénten uning yening iluh nguratiang bli carah kené. Bli masih tusing medaya yening iluh ngelah rasa tekén bli carah kené. Ampurayang sajan bli luh", kéto Karsa ngimbuhin.
Latri laut ngisiang limane Karsa di pategakan, "Bli yéning bli sampun makisid sekolah, dados tiyang nutugang tresnan tiyang niki bli? Napi bli sida nampi tresnan tiyang niki bli?" Latri ngibuhin nekedang manahnyané. "Luh, bli niki anak muani sané biasan dogén. Yéning mangkin ada anak istri luih buka iluh ngorahang tresna tekén bli, indiké ento anak buka paica buatang bli. Napi malih iluh nekedang kasih adané, bli pastika lakar nampi antuk suksmaning manah bli, lan pastika lakar kajaga bli sapenuwuh iluh tresna teken bli" keto Karsa nyautin tur nampi tresnané Latri.
Sapamuput unduké punika Latri lan Karsa nyalanin tresna saking sekolahan sané matiosan. Sasubané karsa makisid sekolah, sabilang a wuku cepok Latri matemu sareng Karsa ring jumahné Karsa, kéto masih dikenkené Karsa sané mlali ka umahné Latri. Kaluargané Latri taler anak rumasa seneng yening Latri ngelah timpal sané patuh tetujoné apang ngidang nglanturang sekolahan risampuné muputang SMA. Ipun sareng kalih seleg pisan nincapang dewék taler nuladin palimbakan sekolahané. Ngraris ipun sareng kalih molihang beasiswa ka dura negara. Karsa molihang beasiswa kedoteran ring Amerika taler Latri molihang beasiswa ngalturang sekolah bahasa ring Prancis.
Karsa sané mangkin sampun metamped-tamped munduhang panganggée lan piranti lakar makikén majalan ka dura negara malih kalih rahina, rumasa girang lakar nglanturang sekolah kedoterané. Sambil makenyem ipun ngingetang pejalan ipuné sapangrauh mangkin sané nénten ja élah pisan. Rumasa égar ipun ngidang ngliwatin galah-galah jelék sané nibénin. Kéto masih Latri suba makikenan majalan malih petang rahina. "Luh, jani raga suba muputang SMA lan lakar nglanturang masekolah ka dura negara tur lakar mepalasan. Iluh sampunang sebet, bli pastika lakar rindu sareng iluh. Kanggoang yéning bli wantah ngidang magatra antuk email. Selegang grastiti malih setiman purnama raga apang ngidang matemu malih", Latri lan Karsa ngaduang janji tresnané mangda sida matemu malih.
Puput.
Olih; I Wayan Kertayasa - https://babakanpole.blogspot.com/
0 comments:
Post a Comment