Bajang Karangasem | Cerpen Bahasa Bali

Galah majalan tusing marérén, tusing mrasa suba makudang-kudang sasih maejohan. Kéto masih pajalané suba pada maelénang, tusing ja ngidang lakar mabesikang. Buka bulané ngajak bintang, diastu pada-pada masunar, sakélawala lakar galang silih maganti. Mula saja patuh ngidang ngiasin petengé, sakéwala tusing ngidang mesanding bareng. Ené suba sané madan pedoman, tusing lakar ngidang ngelidin. Jani tuwuh suba ngancan ngeséng kauh, tusing ngidang buin lakar nyumunin dawuh.

Mula saja tusing nawang, sakéwala ada anak maosang yéning saejoh galahé mangkin kari inget tekening anak, sinah anak sané kaingetang ento masih ngingetang ragané. Yening beneh utawi nénten, tusing masih ngidang negesin. Sakéwala buka eseh embangé, ipun masih makeneh utawi ngenehang dewéké sané patuh ngenehang ipun. Japi tui tusing ada yukti jakti, sakéwala depang suba ené anggon pakenyem di uripé. 

Minaban di patemuané sané jani mula tusing lakar gidang mabesikan, nanging ada rasa sané tusing ngidang ilang uling atiné. Diapin sampun kudiang kénkénang tiyang, tusing masih ngidang ilang. Buka anaké ngorahang, bintang di langité jakti mula lebihan tekén siu, sakéwala tusing ngidang ngalahang sunar bulané sané abesik ento. Kangoang jani tuah ngidang gelahang uling baan rasa. Tusing ngidang ngelahang déwéknyané, paling tusing ngidang makenyem uling ngintipin gatra luwung ipun saking Facebook lan Instagram.

Suba ada kirang langkung ngliwatin molas tiban, ento tusing ja mrasa lantang pisan. Rumasa carah mara dibi, santukan rasa sané ada di atiné tusing taén ngidang masalin. Japi tui jani suba pada ada ané ngelahang, sakéwala enu neket di ati. Kidem kedatang, masih enu merawat lawat ipun. Enah kudiang men, ulian tambed lan dasarin déwéké elek tekén kawéntenan déwéké, jani kanggoang ngelekang paes dogén. Minabang yéning pidan ngorahang isin kenehé nénénang, tusing karuan ipun lakar nyempuduang. Ulian lengeh buahé magandong, kanteg jani déwéké enu masih dadi sasesel. 

Tusing ngidang buin nyumunin dawuh, kanggoang jani tuang ngidang ngrastitiang apang ipun rumasa bagia ngajak jodo ipun. Dumadak ja ipun masih nyinmpen rasa sané buka kasimpen, lakar anggo pangenep idup pejalané nénénang. Diastu buka lutungé puruh sané ngidamang bulan, tuah ngidang mabalih nyangenget nolihin bungahne sunar bulan. Tusing ja lakar dadi dosa selantang tusing ngugul bulan.

Sasukaté mapalasang subaya uling bléléng ento, kapah sajan suba ada magatra, minab tusing malih. Kaling keh sasukat mapalasang, anak dugese bareng dogen, digantine sesai tepuk pidan anak mula ja deweke kimud sajan. Tusing juari ulian rumasa déwéké tusing sesanding. Kapah gati macapatan, digantiné macapatan jeg ngetor asané bayuné pidan. Kalingkéh macapatan, anak ajin uling tepuk dogén anak suba ketug bayuné. Yén kénkén kadén unduke? Carah siapé kalah iyus, mara neked di kalangan anak suba engkes. Jani mara buin maseselang.

Jakti yening tingalin uling pangawak, anak tusing ja asané ngidang ada ngalahang. Kéto masih parasné  anak ayu pisan. Patuh ngajak tuturné lan lampahné anak alus pisan, diastu munyiné dikénkéné misi kasar, sakéwala anak kasar-kasar logat macanda. Ento sanget sané ngaé iseng, edot asané nyumunin galahé ento buin.

Duh angin, tulungin ja keberang kangen tiyang niki. Kéto masih bulan, tetep ja sunarin marginé ipun apang stata rahayu. Diastu tiyang tusing ngidang ngelahang ipun ngantos mangkin, sakéwala rasa niki tetep lakar jagain tiyang. Lakar anggo tiyang lukisan anggo ngiasin embang atiné lan lakar kasimpen ngantos riwekasan. 

Puput

Olih: I Wayan Kertayasa - https://babakanpole.blogspot.com/