Cerpen bahasa Bali "Ngalibeg"

Wayan koplar laut magedi ninggalin bapanyané sané sedeng nuntun tur nuturin ipun. Dahat bengkung wayan koplar taler tungkas tekening rerama, kéwala ipun dueg ngéka daya. Idup ipun jeg stata bungah ulian kaduegan tur pasugihan reramanyané. Tan naenin ipun rumasayang ngecapin uyah sero ring uripnyané.

"Aduh luh, kékén ja lakar panaké ené?". Bapané makaengan sareng memenyané.

"béh bli, eda ento sangetanga. Jani wayan suba gedé apa buin suba dadi pejabat, jeg aksamayang doén bli".

"Saja suba kéto luh, kéwala cariké ajak tegalé anak suba telah anggona mayah kursiné ento. Kapidan sajan tuwuhné koplar lakar dadi pejabat? Mani dipradé ngesor I Wayan, apa lakar anggo meli uyah Luh?".

"Béh, ené buin mabalik kuri maitungan. Banding tekén ngelah tegal wiadin carik nanging tusing ngasilang apa, kan luwungan adep anggon ngetohin Wayan. Sangkal wayan dadi pejabat ené suba iraga ngelah mobil, umah bungah, pis kanti sing telah ban nganggo. Apa sebetang Bli biyin.....? Suwudang monto mapineh ané tidong-tidong.....".

Dahat kaselek sampun bapanyané mapaitungan, tan ja tuah wayan koplar sané bengkung tur sombong, nanging mémé ipun taler sareng gégéan.

" Enah, nah luh lamun kéto, bli lakar mabong-bong malu ka rurungé". Saut bapan koplar majeng méményané.

"Enah bli, kemu suba ngalipur apang tidongan bli strés ngenehang sané tidong-tidong".

Pan koplar laut pesu luas mabongbong ka balé banjar samping rurungé. Engkag-éngkog pejalan ipun nyangkil siap anggé ngalimurang manahnyané sané ngenehang Wayan Koplar.

Patekak-patekok munyin siapé di balé banjar. Ramé anaké mabongbong. Ngancan makelo ngancan luwung pepaluan siapé. Laut nadi akudang-kudang saet.

Pan koplar gupuh najinin siapné,

 “Béh payu jani maadu siapé dini, nah jeg lakar etohin”. Pan koplar ané manahnyané inguh ngenehang Koplar, nyaruang inguhnyané aji matajen. tusing ja makelo siapné laut kaadu,. Pih jeg wayah pisan pepaluan siapné, sehasa tusing ja ada selah musuh lakar menek.

“éaaa,,,,,,,,,,!”

“éa,,,,,,,,,!”. Kéto suryak anaké matajen  nyuryakin musuh siapné Pan Koplar. Pan koplar suba jeg demen pisan hatiné ningalin adu-aduan siapné ento. Krapat-kruput, kreg-kreg….., lantas slampah lempoh  musuh siapné Pan Koplar.

“Pih jani suba gantiné lakar menang, hahahahaha……!”, kéto munyiné pan  koplar  sambilanga kedek ngakak. Asliahan ilang ruwetnyané Pan Koplar.

Nadak sara, yén kénkén kadén unduké, tusing ada ujan angin utawi napi, jeg nadak sara baong siap pan Koplar temus katusuk tur kagéncél olih taji musuhnyané sané sampun bengil punika.

Dané sané ngetohin siap pan Koplar laut siep engkes. Minab makejang pada kéweh mercayin unduké ené.

Duk punika pan Koplar masi enget santukan makejang suba isin kantongnyané kaketogang anggén ngetohin siapnyané.

“Béh ngudiang bisa kéné dadiné siapé nah???!!!!”. Keto Pan Koplar ngamikmik dimanahnyané.

“Sa, dua, telu, …, dasa= kaon!”. Sayané suba negesin yening siapné Pan Koplar kalah di patajenan. Laut enduk sebengnyané pan koplar mabayahan tekén lawan etohnyané.

Grayat-gruyut antuk sebeng ocem layu, pan koplar majalan mulihnyané. Anaké sané nyapatin di jalané, tusing ja ringuanga malih santukan ipun edot sajan apang énggal neked jumah. Liatné enduk sada bayuné makleteg jelék.

“Swastiastu pak”. Keto anak sané mabusana rapi taler polisi ajak tatelu nyapatin pan koplar ring jumahnyané Pan Koplar, tatkala Pan Koplar neked jumahnyané.

Pan Koplar makesiab. “Swastyastu mewali pak”. Ngangsehang masi ipun nyawisin sesambutan polisiné ento.

“Yéning dados tiang matakén, wénten napi ja sujatiné niki pak?”.

“Sapuniki pak, niki tiang sareng papat jagi ngarereh Wayan Koplar, jagi iring titian ka kantor”. Kénten polisiné nyawisin Pan Koplar.

Saget némblés Koplar saking baléné. Ipun sampun mabaju rapi kedas maejas tur madasi.

“ok, mangkin brangkat ka kantor!”. Kénten ipun ngajakin polisiné tur sang sané maejas punika.

“Inggih pak, yening sampunika, tiang sareng sami jagi mapamit”. Kénten ipun makejang mapamit saking umahnyané Pan Koplar.

“Inggih-inggih, ngiring pak…….”. Kénten Pan Koplar nyawisin.

Engsog-éngsog Pan Koplar laut majalan nuju balé ngalihin kurenannyané.

“mémé……, méméné…..,!”. Kéto ipun ngaukin-ngaukin kurenannyané.

“Tiyang bli…….”. kurenan ipun nyawisin. Mén Koplar laut pesu uling balené. Lemet tindakan ipun tur sada ipun ngucek-ngucek yéh paningalannyané. Yéning cingakin saking sebeng utawi semunyané, minaban Mén Koplar rumasa sebet pisan.

 “Ngudiang méméné sebet buka kéto?”.

Pan koplar laut nyagjagin kurenan ipun sané sedeng sungsut. Alus Pan Koplar nakénin Mén Koplar, napi ja sané ngawinang ipun sebet kadi nika. Makelo-makelo, luluh atiné Mén Koplar taler nyaritayang unduknyané.

“Kené bli…..”. Kénten Mén Koplar nyuumunin pacaritan ipun.

Mén Koplar sané dahat sebet nika, maselanan nyaritayang unduknyané sané mangenang pianaknyané ”Koplar”. Santukan sané mangkin, I Koplar sampun kapicutetang olih KPK yéning ipun sareng ngalaksanayang korupsi dana pamerintahé. Punika taler ipun madué khasus sareng polisi, ngenénin indik khasus penganiayaan.

I Koplar sané sabilang wai bungah tur masebeng tegeh puniki mangkin madué khasus. Mangkin ipun maurusan sareng KPK taler polisi. Kahasus sané kapetama, ipun dados tersangka khasus korupsi. Sané kaping kalih ipun madue khasus penganiaayaan majeng silih sinunggil yoana, sangkaning magaragin anak istri.

Pan koplar tuah mendep mapangsegang di samping kurenannyané tatkala ningehang caritané Mén Koplar.

“Tong……., anaké ané busan ento silih sininggil anggopta KPK?!!”. Pan koplar wawu rungu tekening pianaknyané sané kabakta ka kantor polisi.

“Ampurayang tiang Bli…..”. Kénten Mén Koplar laut nyelag pan koplar sané sedeng inguh. Mén Koplar nunas ampura majeng ring kurenannyané, yéning sadurungnyané ipun sampun nombang Pan Koplar mineh-minehin Koplar. Punika taler Mén Koplar rumasa tekén deweknyané pelih sané sampun stata ngilonin Koplar ritatkala Pan Koplar ngopak utawi mituturin Koplar.

“Béh méméné, jani eda ento sanget itunganga. Paling melah jani ngitungang kénkén carané nulungin Koplar apang tusing mabui”.

Saja pan Koplar anak mula mabudi luhur tekénin pianaknyané. Diastu pianaknyané “Koplar” stata degag majeng ipun tur sering pisan nungkasin ipun, kéwala kadiang napi ja jeléknyané I Koplar, bapané tetep pasti lakar nguwantu pianaknyané.

Pan koplar tuising ja lakar nyeselang indik akudang prabiya sané jagi katelasang anggé ngurusang Koplar. Diastu selanturnyané ipun tan madué tegal lan carik, mobil, tur koplar mapecat saking jabatan pejabat. Pan koplar uning yéning wusan ngurusang kasus I Koplar, makejang kasugiahan ipun lakar telas. Sakéwala ipun nénten ja pacang ajerih utawi makirig ngurusang I Koplar, santukan tuah a asiki sané sampun manunggal ring manahnyané Pan Koplar inggih punika; dumogi, wuwusan khasus niki I Koplar sida ngentosin laksananyané tur malajah mabudi becik. Pan Koplar tan madué manah takut lacur anang akidik, ipun mamilih luwihan lacur arta tekening lacur budhi tur laksana.

Puput

Olih; I Wayan Kertayasa - https://babakanpole.blogspot.com/